Ronaldo-a'n a goal khung a pa tan a hlan

Cristiano Ronaldo chuan a goal khung lawm nan van lam a kawk a, amah thih san tawh tu a pa tan a goal khung chu a hlan - Al Nassr chu Al Rayyan lakah 2-1 in a chakpui.

Thawhlehni zan khan King Saud University Stadium-ah AFC Champions League Elite khelh niin, mualneitu Al Nassr tan Sadio Mane chuan goal hmahruai a khung a, second half-ah Ronaldo chuan a khung belh, hun tawp dawnah mikhual team tan Roger Guedes chuan goal khat a thawh ve bawk.

Ronaldo hian box chhungah a ke vei lamin an goal hnihna hi a khung, amah hringtu a pa kha la dam ni se la chuan November 30 khan a pa piancham vawi 71-na a ni ang, mahse a thi tawh - leiah awm tawh lo mah se Ronaldo hian a pa a theihnghilh lo.

Kum 39 mi Ronaldo chuan, "Tun ṭuma ka goal khung chu a danglam, ka pa kha la dam ni se la chuan a piancham a ni chiah ang," a ti a, a goal khung lawm nana ban pharin a pa tan a hlan nghal a ni.