India squad-ah Mizo pali

October international break atan India coach Manolo Márquez chuan player 26 hming a puang chhuak a, player koh chhin zingah hian Mizo pali an awm - dan pangngai angin Mumbai City forward Lallianzuala Chhangte leh Mohun Bagan midfielder Lalengmawia Ralte (Apuia) te chu squad-ah an tel a, Inter Kashi forward Edmund Lalrindika chu I League aṭanga player lang awm chhun niin, Chennaiyin midfielder Lalrinliana Hnamte (Terina) chu a vawi khat nan koh a ni.

Dungtlang/Chanmari tlangval Terina hian kum 2021 khan professional football khel ṭan ve chauhin, India rama club langsar East Bengal leh Mohun Bagan tan a khel tawh a, 2022-23 season khan Bagan tan ISL nomawi a chawi.

Tun season ṭan dawnah Chennaiyin a zawm a, Scottish coach Owen Coyle-a enkawlna hnuaiah league match hnih khel tawhin bul a la ṭan ve ve. Terina hi India Under 23 squad-ah chuan a lo awm tawh a, tun hi senior team-a koh a nih vawi khatna a ni.

Player 26 aṭang hian player pathum chhawk leh tur an ni a, international break-a India inkhelhna tur Vietnam an pan hmain final squad hi puan a ni ang. Blue Tigers hi Vietnam-a khelh tur Tri-Nation friendly tournament-ah an inlan dawn a, a thlengtu Vietnam bakah Lebanon an hmachhawn tel dawn - a awlsam lo ang.