Hun harsa ka hmachhawn - Sinner

Mipa tennis world number 1 Jannik Sinner chuan damdawi hman phal loh chungchang vangin a buai hle tih a sawi a, a tawpah erawh hun hrehawm tak a paltlang theih ngei a beisei tih a sawi.

Tun hnai khan World Anti-Doping Agency (WADA) chuan Sinner hi endik emaw, thuneitu sang lamin ngaihtuah ṭha leh se an duh thu an sawi, infiammiten damdawi hman phal loh an hmang em tih chhuitu hian Sinner an la ring lo.

Kumin March thla khan Sinner hian intih chakna damdawi pakhat a lo hmang tih hriat a ni, endikna vawi hnih a paltlang zo lo. Mahse, International Tennis Integrity Agency (ITIA) chuan a insawifiahna an pawmsak a, engkim a fel niah an ngai.

Amaherawhchu, tun hnai khan WADA chuan Sinner thil tih hi kum hnih chhung inkhel thei lo tura hrem theihna hial a nih thu an sawi thar a, endikna dang a hmachhawn leh a ngai dawn ta niin a lang.

China Open khel mektu Sinner chuan, "Hetiang boruak hriat leh tawn hi nuam ka ti lo, a hrehawm pawh ka ti hle. A nihna takah chuan zan muhil thei miah loa ngaihtuah chang pawh ka nei tawh ṭhin.

"A hma pawh khan ka nun a tihrehawm tawh, tun ṭumah pawh a danglam chuang lo. Amaherawhchu, thil sual leh tih dik loh ka nei lo tih ka chiang a, chu chuan ka inhnem ṭhin," tiin a sawi.

WADA chuan Sinner chungchang hi Court of Arbitration for Sport (CAS) hnenah an thlen a, infiamna lama thubuai nghaihtuahtu sang ber hian Italian tlangval chungchang an ngaihtuah leh ang.