Juventus kan hneh thei ang - Sesko

RB Leipzig forward Benjamin Sesko chuan zanina an hmachhawn tur Juventus chu an hneh theih a rin thu a sawi - club pahnih hi zanin dar 12:30-ah Champions League match khelin an intawng dawn a, inkhel hmuhnawm a beisei ngam ang.

Sesko chuan, "Team ṭha tak kan hmachhawn dawn a, mahse, 100% kan pek phawt chuan eng team pawh kan hneh thei ang. Goal leh assist ka neih theih chuan a hlu lehzual dawn a, last 16 lut turin min pui thei dawn a ni," a ti.

Slovenian forward hi kum 21 mi chauh la niin, nipui transfer lai khan club lianten an rim nasa. Amah duhtu zingah Juventus hming lam rik tel a ni a, Italian club scout-te chuan zanin hian uluk takin a inkhel an en dawn niin an sawi.

Sesko chuan, "Juve leh Inter Milan kan hmachhawn dawn a, kan tan chuan game phurawm tak a ni a, ṭha taka khelh pawh kan duh. Season hmasa aia goal khung tam ka tiam - hma ka sawn zel a, a ṭha zawka khelh a, level sang zawk thlen zel ka duh ani," a ti a, Juve lakah goal khung a tum dawn.

Slovenia tan vawi 35 inlana goal 15 khungtu Sesko hian tun season inelna hrang hrangah Leipzig tan match sarih khel tawhin, goal li a khung a, assist vawi thum a nei. Season hmasa khan match 42-ah goal 18 leh assist vawi hnih a nei.

German club Leipzig hian tun season Champions League-a an match hmasa berah Atletico Madrid chu 2-1 in an ngam lo a, an hmachhawn tur zingah Liverpool leh Inter an la awm bawk - zanina Juve hneh hi an tan a pawimawh dawn.

Chutihrual chuan Juventus hi coach thar Thiago Motta hnuaiah an insiamrem mek a, tun season-a an Champions League match hmasa berah PSV Eindhoven chu 3-1 in an hneh.