Atletico-in fan hrem

La Liga club Atletico Madrid chuan Madrid derby-a che mawi lo an fan pakhat chu an hrem a, damchhunga an khelmuala inkhel en thei tawh lo tura tih a ni.

Pathianni zan khan Madrid derby-ah Atletico hian Real Madrid an mikhual a, team pahnih hi 1-1 in an inhnehtawk. Inkhelh lai hian Atletico fan-te chuan an keeper hlui Thibaut Courtois lam hawiin khelmualah thil an vawm lut a, minute 20 vel inkhel chawlh lailawk a ngai hial.

He thil thlenga inhnamhnawih fan pakhat chu manchhuah nghal niin hrem a ni a, fans dang chungchang hi Police-te nena ṭangkawpin Atletico hian an chhui mek bawk.

Atletico boss Diego Simeone chuan Real goalkeeper Thibaut Courtois chu fan-te chhaih thinrim hmasaah a lo puh tawh a, he thu buatsaih a nih thleng hian Belgian keeper hremna thu erawh tihchhuah a la ni lo.

Madrid khaw club Atletico hi zanin dar 12:30-ah Champions League match khel turin an inlan zui dawn a, Benfica chu khualmualah an lenchilh ang.

Atletico hian tun season-a an Champions League match hmasa berah RB Leipzig chu 2-1 in an lo hneh tawh a, Portuguse club Benfica hian 2-1 vekin Red Star Belgrade an lo hneh tawh bawk.