Mumbai khelmualah Bengaluru

Thawhṭanni zan an chawlh hnuah Thawhlehni zan khan ISL khelh chhunzawm a ni a, Hyderabad khelmualah Chennaiyin an lenglut - an result kan hre hman lo. Zaninah inkhel pakhat a awm leh dawn a, champion lai Mumbai City chuan hnehna la chang vek Bengaluru chu zan dar 7:30 hian an lo mikhual dawn.

Lallianzuala Chhangte captain-na hnuaia khel Mumbai City-in tun season-ah beisei an la phak lo a, match hnih an khelh tawh aṭangin point khat chiah an la nei. Mumbai club hian an match hmasa berah 2-2 in Mohun Bagan an inhnehtawkpui a, match hnihnaah Khalid Jamil-a enkawl Jamshedpur FC chu 3-2 in an ngam lo.

Hetihlai hian Bengaluru erawh beisei phak baka ṭhain season an hmang a, match thum an khelh tawhah an la chak vek - East Bengal (1-0) laka an chak hnuah Hyderabad (3-0) leh Mohun Bagan (3-0) an hneh leh tawh a, inrintawkna sang tak nen Mumbai City an lenchilh ang.

Bengaluru hian Lalremtluanga Fanai an nei a, Mizo midfielder tuai thar hi match thumah bench aṭanga luhtir vek a ni. Mumbai-ah hian Lianzuala bakah Hmingthanmawia Ralte (Valpuia) leh striker Daniel Lalhlimpuia te an awm.