Villarreal an invawrh sang

Spanish La Liga lamah Villarreal chuan an season bul ṭan ṭhat an chhawm nung zel a, Thawhṭanni zan khan league match inkhelah an mikhual Las Palmas chu 3-1 in an hneh - table-ah pathumnaah an invawrh chho.

Villarreal tan hian Nicolas Pepe chuan goal hmahruai khungin, mikhual Las Palmas-in Fabio Silva hmangin si phurh an sut. Mahse, Thierno Barry leh Alex Baena ten goal khat ve ve an khung ve leh a, 3-1 in Villarreal an chak.

November 2023 aṭanga enkawl ṭantu coach Marcelino kaihhruaina hnuaiah Villarreal-in hma an sawn a, tun season-ah league match riat khel tawhin vawi khat chiah an la tlawm - vawi nga an chak a, match hnih draw an nei thung.

Villarreal hian point khat chauhin pahnihna Real Madrid an phak lo a, hmahruaitu Barcelona chu point liin an phak lo mek. La Liga-a an tlawm awmchhun hi Barca laka 5-1 a an mualpho kha a ni.