I League Second Division Aizawl FC-in Chanmari FC an tlansan
Season thara I League khel tur zawnnaah Aizawl FC-in nimin khan Golaghat Stadium-ah PIFA Sports 5-3 in an hneh a; Mohammedan SC nena 2-2 a inhnehtawk Chanmari FC leh MPL3 champion Aizawl FC inthlauhna hi point ruk a tling ta.
I League Second Division-ah Aizawl FC-in point 25 hmuin hmahruaitu an ni. Anmahni hnaih bertu Lonestar Kashmir FC nen an inkarah point thum a awm a, match li khelh hmabakah Jammu & Kashmir club leh Mizoram club hi I League hmunruak pakhat hnawh khat tumin an inum chho zel ang.
Goal a lut duh
Sadesh Gadkari hmangin minute thumna lekah PIFA Sports-in goal an thun a, Aizawl FC-in inkhel an thunun zui. Hindustan lama hattrick siamtu Alfred Kemah Jaryan-a'n minute 22-naah a sut a; Michael Lalremruata, William Lalnunfela leh Laldampuia te'n goal khat ṭheuh an khung zui a, first half-ah 5-1 a ni.
Second half-ah Aizawl FC an chungnung chungin Sadesh Gadkari hmangin PIFA-in an khung hmasa leh a, Dampuia'n goal hnihna a khung hnuah Sadesh Gadkari-a'n hattrick a siam. PIFA hian goal thum ngawt khung mah se Aizawl FC in inkhel an thunun avangin point hloh a hlauhawm loh.
Aizawl FC coach K. Malsawmkima chuan, "Inkhel kan thunun a, an rawn nawr chhunah an tisual zel. Marking ṭhat tawk loh vang a ni a, kan insiamṭhat thuai a ngai a ni. PIFA lamin goal venhim tumin tlar hnungah an inhnawhkhat vek a, chuvangin goal nga kan khung hnu phei kha chuan kan chak loh ka ring lo hrim hrim," tiin inkhel chungchang a sawi.
Mizoram mipui ṭawiawmna ngen zuiin Mala chuan, "Aizawl FC hi club a ni a, mah se Mizoram tana khel kan ni. Tunah chuan Mizo mipui kan ṭanrual a ngaiin ka hria, Mizoram lamah theihtawp chhuahin min lo ṭawngṭai pui zel ula, keini lamin theihtawp chhuahin kan khel zel ang," tiin a sawi.
Hun ṭha bawhpelhtu Chanmari
PTC Stadium Dergaon-ah Chanmari FC-in an elpui Mohammmedan SC an hmachhawn a, Kolkata club hian minute 37-naah captain Ashim Biswas hmangin hma an hruai a, first half-ah goal khat chiah a lut.
Second half minute 73-naah Mohammedan hian goal hnihna an khung leh a, Chanmari tan I League beiseina a bo ti tih hman. Amaherawhchu minute 80-naah Joel Sunday hmangin Chanmari FC-in goal khat an sut a, minute sarih hnuah F. Lalrinpuia'n an siphurh sutna goal a khung leh bawk.
Chanmari FC chak thei dinhmunah an ding zui a, Valpuia ball pass ṭha tak chu tibuaitu nei lo Joel-a'n a khung lo a, 2-2 in inkhel a tawp.
Chanmari FC coach H. Vanlalthlanga chuan, "Kan naute ka chhuang khawp mai. Hun rei tak an khel tawh chungin an theihna zawng awng an lantir thei zel a, Mohammedan lakah goal hmaah an vanduai deuh a, chuvang chauha chak lo chu kan ni," tiin inkhel an thunun zawk thu a sawi.
Nimin inkhel dangah Lonestar Kashmir FC-in Hindustan 3-1 in an hneh a, United SC-in 2-0 in Kenkre Sports an hneh bawk.
Team Dinhmun
# Team Pld W D L GF GA GD Pts
1 Aizawl FC 10 8 1 1 35 14 21 25
2 LoneStar Kashmir FC 10 7 1 2 18 11 7 22
3 Chanmari FC 10 5 4 1 28 16 12 19
4 Mohammedan Sporting 10 5 2 3 22 10 10 17
5 United SC 10 4 1 5 15 21 -6 13
6 Hindustan FC 10 3 2 5 12 21 -9 11
7 Kenkre Sports 10 1 0 9 12 29 -17 3
8 PIFA Sports 10 0 3 7 10 28 -18 3