Dr TAo Semifinal-ah Mizoram Vs Assam
Dr TAo Football champion lai Mizoramin vawiin hian inelna thlengtu Assam nen Indira Gandhi Athletic Stadium, Guwahati-ah zan dar 6:30-ah semifinal an khel dawn.Tlai dar 3:30-ah Manipur leh Nagaland-te an inkhel bawk ang. Final hi May 1, Zirtawpnia khelh tur a ni.
Mizoramin semifinal thleng turin Tripura an hneh a, Meghalaya leh Manipur an draw avangin an group-ah pahnihna an ni. Vawiin hian match hnuhnung bera hnawhchhuah Lalnunmawia a khel thei dawn lo a, MPL1-a Dinthar FC champion puitu Mawitea hi player pawimawh a ni.
Aizawl FC leh Chanmari FC te'n I League Second Divison an khelh avangin 2014 Dr TAo Football champion squad-ah keeper Vanlalhriata, defender Lallawmzuala leh MS Dawngzela, midfielder Lalfakzuala bakah forward Mawitea, R. Laldanmawia leh Zico Zoremsanga te chiah tun ṭumah hian an tel.
Mawitea awm dawn loh mah se Santosh Trophy champion ṭuma Mizoram captain Zico a awm tawh dawn. Tlar hmaah a mal tlat nghal anga, Mawitea hmunruakah MPL2 best forward Dawngtea a awm thung ang.
Silchar-a group stage khelh zawh takah khan Mizoramin an theihna tak tak an la phochhuak lo a, Group 1 hmahruaitu Assam an hmachhawn hunah chuan tlar hnung tih phui ṭhat a pawimawh zual ang.
Mizoram coach HC Zarzoliana chuan, "Assam nen kan practice ho a, an ṭha khawp mai. Huphurh erawh kan huphurh hran lo, Champion nawn ngei tumin theihtawp kan chhuah ang," tiin a sawi.
Mizoram manager Lalṭanpuia Hnamte chuan, "Assam min thlen dan hi a lawmawm loh khawp mai. Silchar aṭanga Guwahati panna turin motor ṭha min pe lo a, min buaipui ṭha lo bawk. Nikuma Mizoramin Dr TAo Football kan thlen dan nen chuan khaikhin chi a ni lo," tiin a lungawi loh thu a sawi.