Premier League Thlirletna Emirates Stadium-ah Chelsea-in an goal chhuah loh an lawm

Pathianni zan khan Jose Mou­rinho-a nauten Arsenal khelmual­ah goal chhuah loh an tum a, an hlawhtling. Arsene Wenger-a nau ten goal khung an tuma, an hlawhchham thung. Hamrik hnuhnung a rik rualin Chelsea player-te lawmin an au a, Arsenal player-te an ngui thung.

Premier League match nga chauh khelh hmabak a awm tawh a, hmahruaitu Chelsea-in point 10 in hma an hruai fal tawh a, champion turin an dinhmun a ṭha tawh hle.

Chelsea hian Nilaini hian khual­mualah Leicester City an tum dawn a, tunkar Pathianni hian Stamford Bridge-ah Crystal Palace an mikhual bawk ang. Heng match pahnihah hian hnehna an chang thei a nih chuan champion nomawi an chawi thei tawh dawn a ni.

Emirates-ah chuan

Wenger-a'n a naute a rem dan aṭangin goal thun an tum tih a chiang a, midfield a roreltu nih pawimawh zia hriain midfield-ah panga a dah. Striker Olivier Giroud hnungah ball thiam pahnih Mesut Ozil leh Santi Cazorla te an awm.

Mourinho-a'n goal venhim a pawimawh tih hriain striker pangngai pawh dahlut ngam loin midfield-ah a hnawh khawm a, tlarhnung a John Terry leh Tim Cahill te pui turin Ramires leh Nemanja Matic a din tir bawk, a thil tum a chiang hle.

Fabregas a langsar

Arsenal player duhlai ni ṭhin Cesc Fabregas-a'n lawm a hlawhna ṭhinah lawm a hlawh tawh lo a, mahse a thiam erawh a theihnghilh lo. Fabregas-a'n Halfway piah aṭangin Oscar-a tan through ball turu tak a pek chu Brazilian midfielder hian a tauh goal teuh hle. Arsenal goalkeeper David Ospina leh Oscar an intauh a, chiang takin Oscar a tlu. Chelsea-in penalty an beisei a, mah se an hmu lo.

Fabregas bawk a langsang chhunzawm a, Arsenal box chhung­ah ball luhpuiin penalty hlawhchhuah ngei a tum. Mahse, a chesual thung. Cazorla nen na lo tea an intawhnaah a tluk der avangin referee Michael Oliver-a'n yellow card a pe.

First half tawp hmain Giroud, Ozil leh Sanchez ten goal khungna hun ṭha an nei vek a, mahse an mamawh goal an khung thei lo vek thung.

Second half-ah pawh inkhel hmelhmang a danglam teh chiam lo. Chelsea-in an goal an veng a, Arsenal-in Chelsea box pawnah ball an inpekual thung. Per Mertesacker chuan hun ṭha a nei a, mahse goal zawnah a pet thei bik lo.

Midfielder Francis Coquelin aia lut Danny Welbeck-a'n Gunners beiseina a siam a, Aaron Ramsey nen an inkawp chuan goal an hlawhchhuak teuh hle. Hun tawp hma hretin Welbeck hian chakna goal thun theihna hun ṭha a nei a, mah se a team tan point thum a hlawhchhuahpui zo bik lo.

Inkhel behbawm

Chelsea hian Arsenal lakah inelna hrang hrangah match nga chhung goal an chhuah tawh lo. Tun season a Arsenal leh Chelsea inkhelh pahnihah Arsenal hian Chelsea goal zawnah vawikhat chiah an pet thei a ni. Arsenal hian darkat riat leh minute hnih chhungin Chelsea goal-ah an khung thei lo tawh bawk.

Arsenal hian goal thun loh hi an nei khat hle a, goal lut lo a an draw hnuhnun ber chu Manchester United niin 2014 February daih tawh kha a ni. Wenger leh Mourinho an inhmachhawn hnuhnung vawi 13 aṭangin Wenger hian a naute hnehna ala chan pui ve miah lo.

Eng nge an sawi?

Arsenal manager Wenger chuan, "Inkhel bul kan ṭan ṭha a, first half kan khel chhe lo hle. Mahse, second half ṭan tirh khan kan talbuai ve deuh a, a tawp dawn­ah kan insiam ṭha leh chauh a ni. Point thum hmuh kan duh a, kan tumah kan chiang bawk. Chelsea kha chuan an goal ven ringawt an ngaihtuah avangin kan tan a harsa a ni. Tu team-in nge chak tum ngam zawk tih chu inhrilh nawn ngai loin mi zawng zawngin an hre vek," tiin Chelsea chu chak tum ngam loah a puh.

Chelsea manager Mourinho chuan, "Kan team hi 'Boring Team' tiin min sawi ṭhin a, hei hi chu a mak a ni. Preimer League-ah goal khung hnem ber dawttu kan ni a, goal difference nei ṭha ber ka ni bawk. Boring kan sawi dawn a nih chuan Arsenal kum 10 chhung EPL a an champion lo hi a ni tawh zawk ang chu," tiin Arsenal a kap.

Sawi chhunzawmin Mourinho chuan, "Kan captain Terry khan a khel ṭha takzet a, kan thawhdun chinah a khelh ṭhat ber ṭum ala ni hial ang. Refree chungchang kha chu sawi zui a ngai lem lo ang, penalty min pe lo tih loh kha chu a ham ṭha hlein ka hria," tiin a sawi.