La Liga Real Madrid chakna Chicharito

Pathianni zan Spanish La Liga inkhelah Javier Hernandez a goal hnih thun hmangin Real Madrid chuan khual mualah 4-2 in Celta Vigo an hneh. He inkhelah hian Toni Kroos leh James Rodriguez te chuan Real tan goal khat ve ve an khung bawk.

Real Madrid-in Champions League semi­final an luh theih na tur a Atletico Madrid laka goal awmchhun khung tu Hernandez bawk Pathianni zan inkhelah hian a langsarah a ṭang leh a ni. League hmahruaitu Barcelona nen an inthlauhna ti zim in point 79 an hmu chiah a, point hnih chauhin Barca an um pha lo.

Table laihawla awm Celta Vigo tan Nolito chuan minute kua na lekah an hmahruaina goal khungin Real a barakhaih chiang hle. Mahse, cham­pion tum Real an buai rei lo, minute 16 naah Kroos chuan yard 16 aṭangin goal ropui khungin an siphurh a sut nghal.

Ṭum dang anglo takin Real tlar hmaah Cristiano Ronaldo aiin Hernandez a langsar zui nghal. Rodriguez nena an inkawp an hmuhnawm a, minute 24-ah goal an sual chhuak nge nge. Rodriguez ball siamsak chu angle zim leh harsa tak aṭangin Hernandez chuan an hmahruai nan a pet lut.

Celta Vigo lam an duai bik lo, Real tlarhnung an nawr let nghal. Forward Santi Mina chuan goal ban dinglam a pet per dawp a, a goal teuh hle. A vawihnihnaah a vanduai tawh bik lo, minute 28-ah an siphurhna goal a thun zui ve nghal.

First half tawp dawn­ah Ronaldo a rawn inlar a, Hernandez a through ball ṭha tak chu la lutin goal ban a pet per zui. Ronaldo a hlauhawm chhunzawm, minute 23 a Rodriguez-a goal thun tur ṭha takin a siam sak.

Second half-ah Celta Vigo in inkhel bul ṭan ṭha mah se Sergio Ramos thawhrah sengin Hernandez chuan an chakna nemnghet turin minute 69-ah he inkhel a goal hnuhnung ber a thun leh a ni.

Real Madrid coach Carlo Ancelotti chuan, "Hernandez khan fak a phu hle, Champions League match hnuah ṭha takin a khel chhunzawm nghal thei a ni. Tunah chuan kan hnenah hlim takin a awm mek a, a hma hun tur erawh kan la sawi ho lo," tiin goal khung tu Hernandez chungchang a sawi.

Champion chung­chang an zawhna chhang­in Ancelloti chuan, "Tun­ah hian team dangin engtin nge an khelh tih leh an chak leh chak loh hi kan ngai pawimawh ber lo. Kan ngaihpawimawh ber zawk chu a tam thei ang ber point hmuh a ni. Inelna ala zo lo a, eng nge lo thleng dawn a la sawilawk theih loh," a ti.

Inkhel dangah Sevilla chuan 2-0 a Vallecano hnehin table-ah palina dinhmun an luah leh tawh a, tlak hlau Deportivo chuan Malaga chu 1-1 a inhnehtawk puiin point khat hlu tak hlawhchhuak mah se relegatin zone an la chhuahsan rih chuang lo. Dinhmun him chin chiaha awm Almeria chuan 2-0 in Eibar an hneh thung a ni.