PSG ngamtu Arsenal
Arsenal chuan team puitling an nihna an lantir chho mek zel - Thawhlehni zan Champions League inkhelah Mikel Arteta naute hian an mikhual Paris Saint Germain chu 2-0 in an hneh.
Emirates Stadium-a inkhelah Gunners tan Kai Havertz-a'n a tauh luh bakah Bukayo Saka chuan freekick aṭangin a chhuih lut a, mikhual team tan Nuno Mendes leh Joao Neves ten woodwork an tih per thung.
Goal hnih a tawk
Arsenal hian an match hmasa zawkah Atalanta an inhnehtawk pui a, tun ṭuma mikhual an thlen hma hian Declan Rice chuan chak ngei an mamawh tih a sawi, inkhel ṭan tirh aṭangin chak an tum tih a chiang bawk.
Minute 20-naah Leandro Trossard chuan box chhunga awm Havertz tan ball a thlawh lut a, German forward hi sang taka zuangin PSG goalkeeper Gianluigi Donnarumma hmaah a zuang, ball tauh khalhin goal kilah a tauh lut.
Goal hnihna luh danah Donnarumma a che fuh tawk lo bawk - Italy international hian Saka-a freekick chu midangin an lo khawih pial dawn emawni a ti a, harsa vak loa dansak theih tur niin lang mah se a bul hnai maiah ball a kaltlang.
Chawlhlawk hmain Gunners lamin goal hnih an nei a, inkhel chawhnu lamah Luis Enrique nauten theihtawp chhuahin nawr let mah se Arteta naute an nghing lo. Tun hma lam ang lo takin an goal neihnsa an hum thei, team puitling zia an nei chho mek.
Arteta a lawm
Captain Martin Odegaard an la chhawr thei lo a, defender Ben White chu hliam vangin a la khel thei lo bawk. Tlarhnung tih danglam a ngai a, a khelh tam lohna hmunah Jurrien Timber chu dah ni mah se hna a tlin, team ṭha lakah goal an chhuah lo.
Nipui bazara an lei Mikel Merino chu a vawi khat nan a inlan bawk - Real Sociedad aṭanga an lak midfielder hi Rice nena inkawp chho tura ngaih an ni a, PSG lakah chumi ruangam chu a tawp lamah an lantir - hun erawh a la mamawh deuh dawn.
Arsenal manager Arteta chuan, "Team ṭha tak lakah inkhel thunun chungin goal hnih kan khung a, a hnu lamah khelh dan phung ti danglam hret mah ila kan tum angin kan chak thei. Goal thumna khung theihna remchang kan insiam nual bawk.
"Premier League nena khaikhin chuan Champions League hi chu a danglam em em a, team puitling leh nghet nih a ngai - chumi chu kan lantir thei a ni," tiin a naute khelh danah a lungawi hle a, an dinhmun dik tak teh nan erawh a la hma tih a sawi.
PSG thar
Arab sum an hman hnuah Paris Saint Germain neitu te hian Champions League nomawi an duh ber a, an nghak rei ta hle. Lionel Messi, Neymar leh Kylian Mbappe te an kawl khawm lai pawhin UCL title an la thei lo a ni.
Khawvel hriat hlawh Angel di Maria, Sergio Ramos, Marco Verratti leh Mauro Icardi te pawh an lo nei tawh ṭhin, tunah erawh an liam zo tawh. Coach Enrique-a'n team thar a din a, mak tak maiin a neih ṭha Ousmane Dembele chu Arsenal hmachhawn tur hian a hruai ve lo.
PSG coach Enrique chuan, "Na takin min nawr a, ball kang kan veng thei lo," a ti. Arsenal hi freekick leh corner-ah an hlauhawm ṭhin a, ball tauh chu an ṭhatna a ni, an khingpui PSG chak lohna lai a ni thung, tun ṭumah pawh an danglamna lai a ni.
Spanish manager hi mahni thuduh leh luhlul tak a ni a, forward ṭha Dembele pawh thu a awih loh vanga hruai lo a nih thu a sawi tawh a, team nghet leh ṭha zual zawk din tur chuan anmahni lam an inchinfel hmasak a ngai dawn niin a lang.