I League 3: A tawp nan Chanmari FC

Season thara I League 2 khel turin Chanmari FC an tling chiang tawh a, tum erawh an la nei - Indian fourth division inelnaa champion a ni a, chumi tur erawh chuan final round group B-ah hmahruaitu an nih hmasak a ngai.

Chanmari hian vawiin chawhma dar 9:00-ah SAT Tirur an hmachhawn dawn a, Mizo club hian point khat chauh an hlawh chhuak a nih pawhin group hmahruaitu an ni dawn - group A leh B hmahruaitute ve ve hian October 6-ah champion zawngin final an khel leh ang.

Lalsangzuala Hmar enkawl Chanmari hian group stage match liah hnehna chang vekin final round hi an inpetkai a, Kolkata khawpuiah pawh an vawk lal len chhunzawm. Kalyani Stadium-ah match thum khel tawhin an chak vek a, goal sarih khungin, an lamah goal khat chiah a lut.

Mizo club hian match khat khelh hmabak la nei chungin I League 2 an inpettling der a, vawiinah group hmahruaitu an nih leh nih loh a chiang dawn. SAT pawh hi I League 2 khel turin an inpettling tawh a, anni pawh hian final khelh châkin chak an tum dawn.

SAT tia hriat lar, Sports Academy Tirur hi Kerala Premier League club niin, an match hmasa pahnihah an chak a, Thawhlehni khan Abbas Union chu 2-2 in an inhnehtawkpui. Vawiinah Chanmari an hneh chuan group hmahruaitu an ni thei dawn.

Mahse, Chanmariin an ṭhat dan berin I League 3 an hmachhawn a, inelna hmachhawn laiin MPL khelh tel ngai mah se, Mizoram top flight league-ah B team tia chhal theih an chhawr a, Kolkata-ah an neih ṭhat tam zawk an kalpui.

Mizo club tan Vincent Lalduhawma chu player langsar niin, goal ruk ngawt a khung tawh a, Baktawng/Tlangnuam tlangval inhliam vangin a dinhmun a chiang lo thung. Tlarhmaah tawnhriat nei ṭha Lalkhawpuimawia (Mapuia) a pawimawh ang.

KC Malsawmsanga leh Lalrokima te I League 3-a player hmuhnawm pawl an tling phak a, Bengaluru midfielder hlui Malsawmzuala'n an match hnuhnung bera a goal khung kha thlir la, Chaltlang tlangval hi a theihna a la ngai reng tih a lang bawk - vawiinah pawh Mizo club hi an hmuhnawm leh ang.

I League 3 final round-ah hian team 10 awmin, group pahnihah ṭhen an ni a, group pahniha a sang pahnih ve ve chu I League 2 khel turin an tling - group-a pathumna pahnihte chuan 2025-26 aṭangin I League 2 an khel ve dawn bawk.

Group B-ah hian MYJ–GMSC leh Abbas Union ten pathumna dinhmun an la beisei ve ve a, MYJ tan draw a tawk laiin Abbas tan chak a ngai thung - vawiin chawhma dar 9:00-ah vek an inkhel ang.