Champions League-ah Barcelona an tho chhuak

La Liga-a an match hnuhnung bera an chak zawh loh hnuah Barcelona an insiamṭha lehnghal a, Champions League match-ah goal nga ngawt an khung - Thawhlehni zan khan an mikhual Young Boys chu 5-0 in an sawp.

Catalan club tan Robert Lewandowski-a'n a khelh ṭhat chhawm nung zelin goal hnih a khung a, Raphinha, Inigo Martinez leh Mohamed Ali Camara (own goal) ten goal khat ṭheuh an khung bawk a, Hansi Flick-a nauten harsatna an tawk lo.

Barca hian Champions League-a an match hmasa zawkah AS Monaco chu 2-1 in an lo ngam lo tawh a, kartawp khan La Liga-a an tlawm hmasak ber an tawn bawk avangin sawisel an tawk hman. Mahse, Thawhlehni zanah erawh team hmuhnawm an nihzia an pholang leh ta.

Inkhel thununtu

Barca-in goal khung turin hun an mamawh rei lo - minute riatna lekah Raphinha siamsak chu Lewandowski-a'n hmahruaina goal ni turin a khung a, minute 34-naah Raphinha hian a belhchhah ve leh bawk. Pedri 'shot' an dan per chu chiang takin goal-ah a chantir.

Catalan club hian chawlh zai an rel lo a ni ber. Raphinha goal khung aṭanga minute thumna lekah Pedri-a freekick chu Inigo Martinez chuan a tauh lut a, 3-0 a ni fel der.

Swiss Super League club tan 'comeback' a harsa tawh dawn tih a lang chiang nghal. Second half ṭan aṭanga minute sarihna lekah Lewandowski-a'n a belhchhah leh a, 4-0 a ni tawh.

Barca-in goal khungpui an mamawh loh tehlul nen Alejandro Balde 'cross' chu Camara-a'n an lamah a tilut zui a, minute 81-na a nih tawh avangin chak tur a chiang zui tiin a sawi theih.

A hming Lewy

Kum 36 ni tawh mah se, Lewandowski a hmuhnawm chhunzawm zel a, a tar thei lo. Polish striker hian tun season inelna hrang hrangah match 10 khelin goal kua a khung tling ta a, assist vawi hnih a nei bawk.

Lewy hi kum 30 tlin hnua Champions League-a goal 50 chuang khung thei pahnihna a ni zui a, Real Madrid legend Cristiano Ronaldo hnung zuiin player ropui huangah a hming a ziak kai leh ta.

Poland international hian Champions League inelnaah goal 96 ngawt a khung tling ta bawk. Barca leh Lewy tan zan chhinchhiah tlak a ni a, Young Boys tan erawh hriatrengna aṭanga nawhreh tlak a ni!

Swiss club hian match hmasa zawkah Aston Villa chu 3-0 in an ngam lo a, tunah goal nga an chhuah leh ta. Young Boys tan hian Joel Monteiro chuan crossbar a pet per a, a goal khung vea a ngaih chu video assistant referee (VAR) rawn a nih hnuah pawmsak a ni lo bawk.