AFC forward BD-a'n record la beisei zel

LZ Juice MPL-ah Aizawl FC-in goal khung record an siam a, mimal goal khung tam ber Lalbiakdika chu season khata goal khung tam ber record siam thei dinhmunah a la ding. Champhai Zotlang tlangval BD-a hian tun inelnaah goal 12 a khung tawh. Aizawl FC-in semifinal an khelh dawn avangin BD-a hi a inhliam lo a nih chuan a tlem berah match hnih khelh tura la nei a, MPL3-a F. Lalrinpuia record goal 13 khum turin goal hnih chiah a mamawh tawh.

BD-a hi Dinthar FC tan a khel tawh a, chutihrualin MPL champion hmasa ber tana a khelh ṭum chuan Maimawms hi First Division club an ni. MPL9-ah khan FC Bethlehem-ah tun ṭuma Aizawl FC enkawltu Victor Lalbiakmawia hnuaiah a khel a, goal li a khung.

Victor-a'n Aizawl FC a zawm hnuah BD-a hian I League club hi zawmin season liam taah erawh Lalrinzuala (8 goals) leh Ramdinthara (Tharpuia - 4 goals) ten an hliah khuh a, goal khat chauh a khung. Tun season-ah Champhai Zotlang tlangval hi rinrawlah awm chhoin goal 12 a khung a, Mizoram Police leh FC Bethlehem lakah hattrick a siam. I Day Football neih zawh takah pawh BD-a hian goal sarih khungin top scorer a ni.

Aizawl FC forward BD-a hnaihtute chu Felix Lalruatsanga (Ramhlun Athletic), C. Lalhriatpuia (Aizawl FC) leh Lalthanpuia (Sihphir Venghlun) te an ni a, goal riat ṭheuh an khung. Felix hian semifinal a khelh dawn loh avangin top scorer beiseina a nei tawh lo a, AFC striker Hriata tan erawh top scorer beiseina a inhawng.

Season liam ta khan Hriata hi Electric Veng tan khelin goal sarih a khung a, tun season-ah hma sawn hretin goal riat a khung tawh. Sihphir Venghlun forward Tepuia pawhin beiseina a la nei a, chutihrualin semifinal-a an hmachhawn tur hi Aizawl FC an nih avangin khung belh a harsa dawn.

Season liam taa top scorer Rinzuala'n MPL11-ah goal khat chauh la khung mah se tun season inhliam vangin minute 10 vel chauh la khel tih hriat a ṭha. Serchhip tlangval tan top scorer a beiseiawm tawh lo a, mahse Aizawl FC-in MPL8 hnua nomawi an chawi tumna kawngah a ṭangkai thei ang.

Aizawl FC coach Victor Lalbiakmawia chuan, "Inrintawkna ngah tak a ni a. A ṭhatzia sawi ngai loin nikumah season tluanin kan hmu. Mahse hliam vangin a duhthusam angin hmalam a pan thei lo. Tunah a hliam te ziain ground-ah a hmel kan hmu leh thei hi a lawmawm a. Tun season-a game hmasa ber a a score hi a team ang pawhin kan lawmpui hle," tiin Vanglaini a hrilh.