Victor-a Aizawl FC tan hmabak a la awm

Victor Lalbiakmawia enkawl Aizawl FC-in league winner nomawi chawi tawh mah se MPL nomawi pui ber an la chawi lo a, ropuina rama lut turin match thum khelh hmabak a la awm. MPL vawi 10 khelh tawhna thlir kirin league round-a pakhatna an champion kher lo.

MPL hmasa berah knockout stage a awm lo a, league round-a pakhatna T. Vanlalhluna leh HC Zarzoliana enkawl Dinthar FC an champion. Maimawms hian point 30 an hmu a, anmahni hnaih bertu Mizoram Police aiin point hnihin a hmu tam.

MPL2-ah final a awm ṭan a, league round-a pakhatna Chanmari FC-in final-ah Luangmual FC hnehin an champion. MPL3 leh MPL4-ah league round-a pakhatna Aizawl FC an champion ve ve bawk. Mahse, MPL5-ah erawh league round-a pakhatna Bethlehem Vengthlang hmahruaina a tam lo. BVT hian point 27 hmuin an hnuaia awm Chanmari FC (26) in point khat chauhin an pha lo a, league round-a pahnihna Lalsangzuala Hmar enkawl Chanmarians an champion ta thung.

Sanga hian MPL6-ah Chhinga Veng a pan a, player ṭha la khawmin local football an thunun. Chhingcows hi champion theihna zawng zawngah an champion a, league round-ah pawh pakhatna a ni. MPL7-ah Chhinga Veng hi league round-ah pakhatna ni mah se final-ah Gift Raikhan-a enkawl Aizawl FC an hneh lo.

Coach Sanga hian Gift Raikhan-a enkawl Aizawl FC a hneh loh hnuin Electric Veng a pan a, MPL8-ah final thlenpui mah se Standly Rozario enkawl Aizawl FC an hneh lo nawn. MPL8-ah hian Aizawl FC hi league round-ah pakhatna an ni a, champion rinkai an ni bawk.

MPL9-ah Aizawl FC hmahruaitu ni mah se semifinal-ah FC Venghnuai hneh lo. Sanga enkawl Chawnpuiin an hun ṭha an bawhpelh lo a, final-ah Venghnuai hnehin an champion. MPL10-ah Chanmari an la inla ṭha a, league round-ah pakhatna ni mah se final-ah Mizoram Police an hneh lo.

MPL11 pawh a danglam tam dawn lo a, league round-a pakhatna Aizawl FC hi champion rinkai ni mah se champion chiang chu an ni lo. Victor hian I Day Football-ah semifinal thlengin inelna thunun mah se final-ah MPL champion lai Mizoram Police an hneh lo.

Chutihrualin Aizawl FC elpui ber tura ngaih erawh Chanmari FC an ni a, Lalsangzuala Hmar enkawl Chanmarians hian I League club lakah league winner nomawi chan mah se MPL nomawi pui ber erawh chan antum dawn lo. Chanmari hian MPL leh I League 3 an khelh kawp an tuar a, chutihrualin round 9 thleng hmahruaitu an ni tih hriat a ṭha.

Aizawl FC leh Chanmari FC te hi league round-ah vawi hnih inkhel tawhin chak zawk an awm lo ve ve a, league round-a pakhatna leh pahnihna te hi final-ah an inhmachhawn a nih chuan chak zawk an awm tawh dawn. Victor Lalbiakmawia hoten MPL nomawi pui ber chawi turin hmabak an la nei a, Police laka I Day Football final phuba la turin emaw Chanmari laka an chungnung zawkna lantir tur emaw pawhin semifinal-ah Sihphir Venghlun an hneh phawt a ṭul dawn a ni.