Sawi lawk angin Foden a lo kir ta!

Premier League leh Champions League champion an nih theih nana ṭangkai tak Phil Foden chu Manchester City tan a inlar leh ta, season tirah hliam vangin a khel tam lo, beisei a phak lo deuh bawk - tunah erawh a nihna tak kan hmu.

Man City leh Slovan Bratislava ten Champions League an khelh hma khan Pep Guardiola chuan, "A ṭhat dan berin a lo kir leh dawn hnai," tiin Foden chungchang a sawi a, English forward hian Slovakian club lakah City hi 4-0 in a chakpui.

Tehelne Pole, Bratislava, Slovakia-a inkhelah captain armband hrengtu Ilkay Gundogan chuan goal khung bul ṭanin, chawlhlawk hmain Foden chuan cool zetin a khung belh, second half-ah Erling Haaland leh substitute James McAtee te goal kan hmu bawk.

Man City striker Haaland hian tun season atana a goal 11-na khung tur hian mual laiah ball a chang fuh leh hle a, chak taka tlanpuiin a khung zui, an goal hnuhnung ber McAtee khung hi Foden siamsak a ni thung.

Season hmasa lama goal 27 khungtu Foden chungchang sawiin Guardiola chuan, "A ṭhat dan berin a la khel chhuak lo, zawimuangin a ṭhat dan tak ni turin a lo kir mek a ni," tiin a player duhlai lakah beiseina a nei sang hle.

Man City hian UCL an match hmasa zawkah Inter Milan chu 0-0 in an inhnehtawkpui. European football inelna sang berah hian October 24, Nilaini zanah an inlan leh dawn, anmahni mualah Sparta Praha an mikhual ang.