Zaninah Europa League: Manchester United hmachhawn tur FC Porto

English football awp ṭhintu Manchester United chuan an ropuina ṭhin Premier League-ah pawh champion rinkai an ni phak tawh lo a, Champions League khel ṭhin team 36-a an tihpun hnuah pawh khel phak loin Europa League an khelh a ṭul. Europa League-ah pawh Erik Ten Hag-a hoten bul an ṭan ṭha chuang lo a, Dutch manager tan a dinhmun sawhnghet turin inkhel apiang a pawimawh tawh.

Manchester United-in zanin dar 12:30 hian FC Porto an tlawh dawn a, Estadio do Dragao-ah Champions League-a champion tawh pahnih an inkhel dawn a, an khelh tur erawh Europe-a football inelna sang ber ni loin a dawttu Europa League a ni thung.

A fuh thei lo

Man United-in mualpho taka Liverpool an hneh loh hnuah international break tla zepin an insiamṭhaah a ngaih theih hman. Ten Hag-a hoten Southampton 3-0 a an hneh hnuah League Cup-ah Barnsley 7-0 in an sawp.

Mahse, Crystal Palace lakah goal an khung theih loh an tuar a, goal awm loin an inhnehtawk. Eagles laka point khat chauh an hlawhchhuah hnuah pressure an ngah chho a, Europa League-ah Twente nen 1-1 an inhnehtawk avangin sawiselna an tawk nasa hle.

Pressure hnuaiah Man United an buai tulh tulh a, kar liam ta khan Tottenham Hotspur lakah 3-0 in an mualpho. Spurs ṭantuten Ten Hag chu, "Naktukah an ban dawn che," tiin an au el a, tun thleng chuan an la ban lo. Dutch manager hian a dinhmun ṭhat thu sawi a, chutihrualin a result a zirin October international break hmaa ban theih a ni.

Hliam leh a chhehvel

Man United player-te an dam kim ṭan a, chutihrualin dam kim tak erawh an la nei thei lo. Tlarhnung ti chak tura duh taka an lakluh Leny Yoro a la inhliam reng a, left back rintlak Luke Shaw pawh chhawr theih a la ni lo.

Spurs an hneh loh ṭumin Kobbie Mainoo leh Mason Mount te hliam vangin lakchhuah an ni a, anni erawh khelh theih dan a awm thei ang. Training-naa inhliam Harry Maguire dinhmun a chiang lo.

Chutihrualin Victor Lindelof pawh hun rei tak a inhliam hnuah bench a rawn luahlum tawh a, left back Tyrell Malacia-a'n training a zawm tawh bawk. Man United hian player inhliam chu an nei ngei a, mah se Porto lakah chhuanlam an nei thiang lo.

Ten Hag-a hote hi kil tinah an insiamṭhat a ṭul a, tlarhnung a pawp ve reng a, tlarhma lamin goal khung an harsat. Joshua Zirkzee-a'n club tana a match hmasa berah goal khung nghal mah se a hnu lamah goal a khung tawh lo.

Man United-in goal khungtu an mamawh a; Zirkzeeleh Rasmus Hojlund te aṭangin goal a lut rih loh a nih pawhin Marcus Rashford leh Alejandro Garnacho te talin mawhphurhna an lak a ṭul ang.

Hriatthiam har Porto

Porto hi tun dinhumah Portuguese club ṭha ber an ni tawh lo a, season liam ta khan Sporting leh Benfica an tluk loh avangin Europa League an khelh a ṭul phah. Tun season-ah Porto hian bul ṭan chhelo mah se an elpui ber Sporting an hneh tawh lo.

Europa League-ah Bodo/Glimt hmachhawn tawhin Porto hi 3-1 in an chak lo a, Man United aiin bul an ṭan chhe zawk a, English club ang thoin chak an mamawh. Porto hian player langsar an kawl meuh lo a; goalkeeper Diogo Costa leh Spanish midfielder Nico Gonzalez te chu a langsar zinga mi an ni.

Inkhel dang

Tottenham Hotspur-in an match hmasa berah player 10-a khelin Qarabag 3-0 in an sawp a, hetiang zat tho hian Man United an sawp leh bawk. Spurs hian zanin dar 10:15 hian Ferencvaros an hmachhawn dawn a, khualmuala khel tur ni mah se chak tura rinkai zawk an ni ang.

Nomawi chawi thiam Fenerbahce-in zanin dar 12:30-ah Twente an hmachhawn dawn a, Turkish club hi Jose Mourinho a enkawl a ni a, Dutch club an hmachhawn zawhah Manchester United an hmachhawn leh dawn. Dutch club lar zawk Ajax-in Ten Hag-a awm loh hnuah beisei an pha lo a, chutihrualin Europa League-ah erawh chakin bul an ṭan.

Zanin dar 10:15 hian Ajax-in Slavia Prague an hmachhawn dawn a, point thum a beisei ang. Match hmasa berah German club pahnih Hoffenheim leh Eintracht Frankfurt ten chak hmel an hmu lo a, zanin hian Dinamo Kiev leh Besiktas te an hmachhawn ang.