Dortmund-in Celtic an sawp

Tun season-a tlawm la nei lo Celtic an tlawm meuh chuan an tlawm chiang hle - Thawhlehni zan khan Champions League match-ah Borussia Dortmund an lenchilh a, German club hian 7-1 ngawtin an lo sawp!

Dortmund tan Karim Adeyemi chuan hattrick a siam a, Serhou Guirassy chuan goal hnih a khung bawk - a goal khung pakhat chu penalty aṭanga a chhuih luh a ni. Emre Can (penalty) chu Dortmund tana goal hmasa ber khungtu a ni a, Felix Nmecha chuan a hmawr a bawk thung.

Celtic tan hian Daizen Maeda chuan goal khat a khung ve a, Japanese winger goal khung hi si phurh sutna ni mah se, a hnuah goal ruk an chhuah leh tak avangin Scottish club hi an tlawm chiang hle.

Celtic hian an match hmasa berah Slovan Bratislava chu 5-1 in an sawp a, Champions League season bul an ṭanna match-a an chak hmasak ber an tawng. Thawhlehni zanah erawh thawnthu a danglam ta.

Kasper Schmeichel tan zan theihnghilh tlak a ni. Celtic keeper hian goal sarih a chhuah a, Dortmund a hmachhawn hmaa CL match kua a khelhah goal nga chiah a chhuah!

Hetihlai hian coach Brendan Rodgers pawhin a record duhawm lo a pawtsei a, Champions League-a match khat aia tam goal sarih lai chhuahna nei awmchhun a ni. Dortmund hma hian Barcelona (7-0; 2016) leh Paris Saint-Germain (7-1; 2017) khan a team chu goal sarih ngawt a lo chhuahpui tawh.