Hyderabad-in Chennaiyin an chelh

Indian Super League inkhelah Thawhlehni zan khan Hyderabad FC chuan Chennaiyin an mikhual a, 0-0 in an inhnehtawk - minute 71-naah Hyderabad defender Parag Shrivas chu a yellow card pahnihna a hmuh avangin hnawhchhuah a ni a, Chennaiyin hian tam zawk an nih an chhawr thei chuang lo.

Hyderabad tan tun season-a a vawi khat nan Isaac Vanmalsawma'n inkhel bul a ṭan a, Independence day football-a Chanmari FC tana inlan hman Mizo midfielder hian minute 90 a khel tluan.

Isaac bakah hian dan pangngai angin Ramhlunchhunga'n inkhel bul a ṭan a, defender Laldanmawia chu minute 84-naah bench aṭangin a lut bawk - Chennaiyin lamah Mizo player pathum an neihten bul an ṭan vek bawk.

Owen Coyle-a enkawl team tan hian PC Laldinpuia leh Laldinliana Renthlei te chuan tlarhnungah bul an ṭan a, a vawi khat nana India squad-a koh Lalrinliana Hnamte (Terina) chuan bul a ṭan bawk - Mizo pathumte hian league match vawi thum an khelh tawhah bul an la ṭan vek a ni.

Chennaiyin hian match thum an khelh aṭangin point li an nei mek a, Hyderabad erawh point khat chiah an la nei thung - hun tawp lama player kim loa an khelh miau avangin Thawhlehni zan inkhelah a lawm zawk an ni a, tun season ISL-a an point hmuh hmasak ber a ni bawk.