Santosh Trophy Hyderabad-in final round an thleng dawn

78th National Football Championship for the Santosh Trophy final round chu Hyderabad-in an thleng dawn. Hyderabad hian 1966-67 season khan Santosh Trophy hi an thleng tawh a, kum 57 hnuah an thleng leh dawn chiah.

Final round hi December thla tira aṭanga khelh ṭan tur a ni a, inelna thlengtu tur Telangana bakah inelna hnuhnung ber finalist Services leh Goa ten final round an lut sa. Group stage chu November-ah khelh a ni dawn a, group match khelhna tur erawh tihchian a la ni lo.

Mizoram Vs Manipur

Santosh Trophy group stage hi hmun hrang hrangah khelh a ni ṭhin a, kuminah erawh zone hmangin group awmna tur siam fel a ni. AIFF chuan team tana zin man senso sang lutuk phuhruk nan state inhnaih ho chu group khatah an dah khawm a, India hmarchhak state pariatte pawh group hnihah ṭhen darh an ni.

Group E-ah inelna hnuhnung ber semifinalist Mizoram, Manipur, Arunachal Pradesh leh Nagaland te an awm a, group D-ah Assam, Sikkim, Meghalaya leh Tripura te an awm thung. Group khat aṭangin team pakhat zel chauhin final round an lut dawn.

AIFF-in Santosh Trophy hnuhnung bera semifinalist pahnih Mizoram leh Manipur te group khata a dah hi thilmak a tling. Team ṭha pahnihah pakhat zawk chauhin final round an luh dawn tihna a ni thei ang.

Inlena hnuhnung berah kha chuan zone hmanga group ṭhen a ni lo a, Arunachal Pradesh-in final round an thleng bawk nen, NorthEast aṭangin team panga ngawtin final round an lut.

Engtin zel?

Mizoram hian coach Lalsangzuala Hmar hoin inelna hnuhnung berah final round an lut a, semifinal an thleng pha bawk. Chutihrualin tun hnaia Mizoram record erawh a ṭha tawk lo.

Mizoram hian 2017–18 season khan final round lutin semifinal an thleng a, hemi hnua final round an khelh lehna hmasa ber chu inelna hnuhnung ber 2023-24 season kha a ni.

2018–19 season-ah Mizoramin Lammualah Meghalaya hneh loin final round an lut zo lo a, 2019–20 season-ah Tripura, Arunachal Pradesh leh Assam te nen group khatah awmin final round khel turin tling mah se Covid-19 vangin khelh a ni ta lo.

Covid-19 vanga inelna neih a nih loh hnuah 2021–22 season khan chhunzawm a ni a, Mizoramin Manipur an hneh loh avangin final round an tling zo lo. 2022–23 season-ah group ṭhen dan thlakin Kerala, J&K, Bihar, Rajasthan leh Andhra Pradesh nen group khatah awm mah se Kerala hneh loin an tling zo lo bawk.

Tunah hian group stage thlen a dil theih a, Mizoram Football Association-in thlen an dil a rinawm lo zawk. Hei vang hian group stage hi khualmualah khelh a ngai dawn tihna a ni a, Manipur an awm ve miau avangin Mizoram tan final round thlen hi a awlsam lo ang.