Chanmari FC-in I League 3 final an lut

I League 2 khel turin Chanmari FC an tling tawh a, nimin khan Lalsangzuala Hmar hote hian I League 3 group match hnuhnung berah SAT Tirur 3-0 a hnehin final an lut. Mizo club hian October 6, Pathianni tlai dar 3:00-ah group A pakhatna Diamond Harbour nen nomawi an inchuh ang.

Kalyani Stadium-a inkhelah Chanmari tan Moses Lalrinzuala, PC Lalruatsanga leh Ephraim Lalremtluanga ten goal khat ṭheuh an khung a, hnehna chang turin inkhel an thunun bawk. Chanmarians hian group stage aṭanga playoff thlengin an khingpui an hneh vek a, Mizoram football tan chanchin lawmawm a tling.

An thiam e

Chanmari hian SAT Tirur an hmachhawn hmain I League 2 khel turin an tling tawh a, chutihrualin final khel turin point hmuh an la mamawh. Kerala club SAT Tirur hian hnehna an chang a nih chuan final an lut thung dawn.

Lalsangzuala Hmar hoten point khat chauh mamawh mah se inkhel an thunun a, minute 11-na lekah KC Malsawmsanga ball pek luh ṭha zet chu Moses Lalrinzuala'n um lutin goal hmahruai khung nan a hmang.

Chanmari tan Sawmsanga a khel ṭha zui a, a penalty hlawhchhuah chu minute 32-naah J. Lalruatsanga'n a khung. Mizo club goal dang khung belhna remchang an nei a, Thanglalven Gangte leh Lalrokima ten box pawn aṭangin goal zawnah an pet thei lo.

Second half-ah goal a lut tlaia inkhela chungnung zawk erawh Chanmari tho an ni. Kerala club pawhin chance an rawn nei a, goalkeeper Zothanmawia (T. Mawia) a che ṭhat bakah woodwork-in an chhan. Injury time-ah Ephraim-a'n overlapping a la ṭha a, chak nemnghehna goal a khung.

Record ṭha mi

Chanmari FC-in I League 3 an khelh hma zawngin MPL-ah pakhatna an ni a, I League 3-a an insawrbing hnuah chauh an chesual. Coach Sanga hote hian I League 3-ah record an nei ṭha a, an group-a awm GMSC, HAL, Coramandal FC leh RKM Football Academy te an hneh vek.

I League 3 group stage hi Chanmari FC-in RG Stadium-ah an thleng a, mahni muala khel an nih avangin Sanga hote ṭhat dan hi hriatthiam a la har. Final round-ah Chanmari fiahin an awm a, 'distinction'-ah an pass! Mizo club hian Aizawla an hneh tawh MYJ-GMSC bakah an group-a awm dang Dalbir FA, Abbas Union leh SAT Tirur te an hneh vek.

Chanmarians hian goal 10 khungin goal khat chiah an chhuah a, match liah vawi thum an clean sheet a, final khel tur pawhin an inringtawk khawp ang. Final-ah hian Mizo club hian group A pakhatna Diamond Harbour an hmachhawn dawn a, Kolkata club pawh hian Chanmari ang thoin an khingpui an la hneh vek a, vawiin hian match hnuhnung berah beisei tur nei tawh lo Downtown Heroes an hmachhawn ang.