Messi awmna Inter Miami an chungnung; Nomawi 46 teh meuh a pet chhuak ta!
Lionel Messi-a goal hnih hmangin Inter Miami chuan Columbus Crew 3-2 in an hneh a, a vawi khat nan Major League Soccer (MLS) Supporters' Shield an la, midang tan umphak theih an ni tawh lo.
MLS Eastern Conference-ah Inter Miami hian match 32 aṭangin point 68 an hmu a, anmahni hnaih bertu chu tun ṭuma an hneh tak Columbus hi niin, anni hian point 57 an hmu thung a ni.
Inter Miami captain Messi hian football a khelh hunchhungin, club leh tam tan nomawi 46 a chawi tling ta der mai! Football khelh tawh zingah ania aia champion tam an awm lo, nomawi chawi hnem ber a nihna chu a sawhnghet zual zel.
Messi leh Suarez
Nimin zing Lower.com Field-a inkhelah chawlhlawk hma deuhin Messi a inlar. Argentina captain hian hla deuh tak aṭanga a ball kang hmuh chu a awmin a la thla a, amah vengtu defender thai bumin goalkeeper Patrick Schulte rawn tlan chhuak chu a pet bum leh bawk.
A la duhtawk mai lo - chawlhlawk hma chiahin freekick an hmuh chu goal kilah a chhuih lut leh bawk. Freekick aṭangin goal 66 a khung tling ta chiah a, English ball pet thiam David Beckham nena record inṭawm an neih chu a kalsan ta chiah.
Inter Miami hi awlsam taka chak erawh an ni bik lo, second half-ah Diego Rossi chuan si purh sut ṭhenin Luis Suarez a inlanh ve bawk a, Uruguay international hlui hian hla deuh aṭangin a tauh lut.
Columbus tan Cucho Hernandez chuan penalty khungin beiseina an insiamṭhat leh a, mahse goal an khung aṭana minute hnih hnu lekah an defender Rudy Camacho chu hnawchhuah niin, hun tawp dawnah Inter Miami keeper Drake Callender chuan hun tawp dawnah Juan hernandez-a penalty a dansak bawk a ni.
Nomawi chu
MLS-ah chuan Eastern leh Western Conference an awm, an inkhelh kual vek hnuah conference pahniha a sang pariat ve ve ten playoff an khel ṭhin. League round bika a sang ber hnenah hian MLS Supporters' Shield hi thlan a ni - Inter Miami tan thil thar a ni.
Messi chuan, "Kan thil tum hmasa chu a hlawhtling ta phawt a, tunah chuan hmabak dang kan ngaihtuah chhunzawm leh nghal ang. Playoff hautak zet mai kan hmabak leh dawn, chutihrualin keimahni khelmualah kan khelh dawn avangin a lawmawm," tiin a sawi.
MLS Supporters' Shield la thei nih hi thil hlu tak a ni - league round lama an chungnun ber avangin Inter Miami chuan playoff match dangte chu anmahni khelmualah vek an khel thei ang, season hmang ṭha nih man a awm dawn hle.
Ruahman dan chuan November thla chawhnu lamah Eastern Conference semifinal khelh a ni ang a, chumi hnuah Conference Final leh MLS Cup final te chu Inter Miami hian anmahni khelmualah vek an khel ang.