Number 1 Novak Djokovic a tla

Novak Djokovic chu US Open khelh laiah line judge a vuak per avangin hnawl (disqualified) a ni! World number 1 a tlak takah chuan Grand Slam champion thar kan hmu ngei dawn tihna a ni nghal bawk.

Pathianni zanlai khan Flushing Meadows, New York-ah Djokovic leh Pablo Carreno Busta ten last 16 match an khel, set hmasa bera 6-5 a nih laiin Djokovic a che fimkhur tawk lo, a thimrim inhrikthlak nana a ball vuak chuan a hnunga awm hmeichhe line judge hrawkah tak a fuh.

Serbian tlangval hi a vuak per judge lamah a tlan phei nghal a, chair umpire Aurelie Tourte, tournament referee Soeren Friemel leh supervisor Andreas Egli ten minute 10 chhung an ngaihtuah hnuah thutlukna sawi zui hlawh tak an siam ta a ni.

Hrem a nih vangin world number 1 hi US Open aṭanga ranking point a hmuh tur chu pek a ni dawn lo. Last 16 thleng chinin an dawn tur $250,000 (Rs nuai 183) a chawi zawk dawn, a thiltih avang hian hrem nan pawisa dang pawh chawi thei thei dinhmunah a ding.

Arthur Ashe Stadium-ah Djokovic leh Busta ten inkhel hmuhnawm an chhawp chhuak, a bik takin Djokovic-a khel ṭhain a service a hum ṭha hle, a service bikah phei chuan point a hloh mang lo, mahse a duh ang vekin thil a kaltluang bik ta lo.

Set khatna a ni a, 5-4 in Novak a chungnung, a service lai ni lo mah se 0-40 ngawta hma hruai bawkin set point vawi thum a nei tihna a ni. Mahse, set point pathum a chhawr ṭangkai lo a, a zawna point ruk a hloh avangin 5-5 a ni leh rih.

Djokovic hi a dar na vangin enkawl lailawk a ngai a, a rawn kir leh hnuah service zuiin point a hloh. Spanish tlangval zawkin 5-5 a nih hnu, game an khelh leh hmasakah 0-15 in hma a hruai, na a neih bakah a chet fuh loh vanga thinrim Djokovic chu a insum zo ta lo.

Ball pakhat zawk chu a sira ding ball girl lak turin na lo tein a vaw phei hmasa phawt, a iptea ball la awm pakhat chu la chhuak lehin kawh angreng takin a kalna tur ngaihtuah lem lo takin a vaw phei, ball hian line judge hrawkah tak a per avangin thil a pawi zo ta.

Infiamna peng hrang hrang hian kalphung an nei ṭheuh, tennis-ah chuan player bakah a entu thlengin uangthuang leh sahawk thil tih lan phal a ni ngai lo - fans pawh an bengchhen deuh chuan umpire hian ngawi turin a ngen hmiah zel.

Djokovic-a'n ball a vuak dawn khan a kalna tur a ngaihtuah lo tih chu a chiang a, thil a thlen hnua a awm danah erawh a tisual palh a ni tih a hriat theih. Chutihrualin game 9-na an khelh lai pawhin a thinrim a lang chhuak tawh, a thil tihah inchhir mah se hremna a pumpelh phah ta lo.

Inkhelh laklawh lai pawhin ball hi vuak sual theih a ni, entu leh umpire ngei pawh vuak per theih an ni. Mahse inkhelh laklawh lai chuan a pawn lama vuak chhuah chu tihpalh a ni zel, tun ṭuma thil thleng erawh service dawna ball thlan laia thleng a ni.

Kumin Australian Open-ah pawh khan Nadal-a'n second round-a Federico Delbonis a hmachhawn ṭumin court sira ding ball girl a vuak per tawh - hei erawh a khingpui service a vuak letna lama thleng a ni a, tun ṭuma thil thleng nen khaikhin chi a ni lo, tihpalh a ni thung.

An thiltih a zirin hremna dan hrang hrang a awm - point paihsak leh game paihsak te hi an hremna langsar a ni fo, nikum US Open-ah mai pawh khan Rafael Nadal chu hun a pawhtlai luih (delay) avangin hrem a lo ni tawh. Roger Federer leh Serena Williams te meuh pawh pawisa chawitir leh point paihsak an lo ni tawh.

US Open inbuatsaih nana an hman ṭhin Cincinnati Masters-ah pawh 2007 khan Anastasia Rodionova chu Angelique Kerber nen an inkhelh laiin entu awmna lamah ṭul lo takin ball a vua a, inkhel chhunzawm thei lo turin tih tlak (disqualified) a lo ni tawh bawk - player hrem tawk hi sawi vek sen an ni lo ang.

Ṭawngkam mawi lo hmang, nungchang mawi lo leh racquet tichhiate hi hrem an ni ṭhin bawk, a tam zawk chu pawisa an chawitir ṭhin. Djokovic an hremna kawngah US Open thuneitu lamin tih dik loh an nei lo, dan hmangin an tih tur diktak an ti a ni.

Chutihrualin ngaihdan hran a awm thei, mi tam tak chuan a thil tih avang khan 'warning' a hmu turah an ngai. Davis Cup lama Great Britain team captain Leon Smith pawhin Djokovic chu disqualify nghal ngawt loa chance pek a la phu nia a hriat thu a sawi ve bawk.

Tennis player ropui an sawi apiangin Roger Federer leh Rafael Nadal te hming a langsar ṭhin, an dinhmun ang hi luah phak ve chiah lo mah se Novak Djokovic pawh hi sawi hmaih thiang lo zinga mi a ni.

Kum 39 mi Federer-a'n Grand Slam nomawi 20 a chawi tawh a, a chung berah a awm. Pahnihna, kum 34 mi Nadal-a'n title 19 a nei tawh, kum 33 mi Novak hian 17 a nei thung, a chunga mite pahnih inlan theih lohna tournament-ah hian rinkai ber ni chungin a inlan.

Tournament khelh ṭan hma khan Djokovic hian, "Grand Slam chawi hnem Federer leh Nadal te umphak chu ka thil tum zinga mi a ni," tiin a sawi. US Open-ah hian champion ni se chuan a hnaih sawt dawn, season kal laia khelh hmabak French Open hi Nadal inkhelh thiamna hmun a nih avangin kawng a harsa hret ang.

Court chhungah a tum reng vangin hlauhawm takin ball a vua a, thil thleng chhunzawm thei a ngaihtuah lo. He thil thleng avang hian US Open tournament referee chuan Grand Slam dan leh hrai tlawhchhanin Novak Djokovic chu 2020 US Open aṭangin a paih thla a ni.

Hnawl a ni a, inelna a khelh chhunzawm dawn loh bakah hian kumin US Open aṭanga ranking point a hmuh belh theih tur ang chu a hmu dawn lo, lawmman atana a pawisa dawn tur chu a chawi zawk dawn a, hemi bakah hian a thil tih hrem nan pawisa a chawi belh bawk ang.

Thil thleng zawng zawng avang khan pawi ka tiin ka hrilhhai takzet. 

A dinhmun ka ngaihven zui a, ngaihtuahawm a nih loh avangin Pathian chungah ka lawm hle, khatianga ka ti na palh mai kha a pawi ta ti hle a ni. Tum lawk thil ni lo, tihpalh takzet a ni, ka thiam lo hle bawk - US Open chungah ngaihdam ka dil.

Paih thlak ka nih chungchangah chuan, player ka nih avangin ka tih dik loh leh fuh lo laite ka siamṭha ang a, he thil thleng hi zirlaia hmangin hmasawn ka tum ang. Ka chhungkua leh team bakah min ṭantu fans, hun harsa karah pawh ka tana ding tlatte chungah lawmthu ka sawi.

- Novak Djokovic

Roger Federer, Rafael Nadal leh Novak Djokovic ten Grand Slam an insem mai ṭhin, player ropui pathum tel loa major tournament semifinal chin an khelh hnuhnung ber chu 2004 French Open daih tawh kha a ni.

Grand Slam tournament 64 zet an khelh liam leh tawh hnuah player ropui pathum tel loin inelna lianah semifinal an khel leh dawn ta. Kuminah hian Covid-19 vangin Nadal a inlan lo a, hliam vangin Federer pawh a tir aṭangin a inlan lo.

Major title la tawh zingah Stan Wawrinka a inlan lo bawk a, world number 1 Djokovic hma hian Andy Murray leh Marin Cilic te an tla tawh bawk - player la dam 14 zingah Grand Slam champion an la awm lo, hmel thar chu kan hmu ngei dawn tih a chiang ta.

Seeded pahnihna Dominic Thiem, season hmasa finalist Daniil Medvedev leh seeded pangana Alexander Zverev te an la dam a, anni pathum hi champion tura rinkai zual zinga mi an ni ang.

New York khawpuia US Open khelh laiah hmeichhe doubles player Kristina Mladenovic leh Timea Babos te chu coronavirus kaihhhnawih vangin an inkhelh dawn hnaiah an inhnukdawk, mipa singles player Benoit Paire chuan hri a kai tih hmuh chhuah a lo ni tawh bawk.

French player Paire hian Covid-19 a kai a, inlan tura tih ni mah se a inkhel ve leh thei lo. Paire kaihhnawihah hian mi10 chu inkhunghrang tura tih an ni, inven ngai zingah hian hmeichhe doubles lamah seeded pakhatna Mladenovic pawh a tel.

Mladenovic leh Timea Babos te hi inkhel turin an inpuahchah hman, mahse Pathiannia match an neih hma lawkin sorkar thuneitu lam aṭangin hriattirna an dawng. United States Tennis Association (USTA) chuan sorkar thu chhuak an zawm a ngaih thu an sawi ve bawk.

Ram mala chhutin US hi coronavirus kai tamna ber a ni a, a bik takin US Open khelhna New York-ah hian hri kai an tam. Player tam tak chu inelna hmachhawn turin an zin duh loh phah. Hmeichhe player ranking sang zual 10 zinga pali ngawt an inlan lo a ni.

US Open hi season tira an ruahman hun pangngaiah khelh a ni, mahse a hmuna entu an awm thei lo thung. May thlaa khelh tur French Open chu tun thla chawhnu lam hian an khel zui dawn, US aṭanga Europe khawmualpuia hawte chu khunghran an ngai dawn a, Paris-ah inlan thei lo an awm nual ang.

Mipa singles world number 2 Rafael Nadal chu clay court lama insawrbing a duh vang leh, US Open khelhna hmuna hri leng a la tam vangin a inlan duh lo. Paris khawpuiah chuan stadium khat tlat la theih loh mah se a hmuna entu awm turin ruahmanna an kalpui mek a ni.

British chhuanvawr ni ṭhin Tim Henman chuan tihpalh vang liau liauin Wimbledon 1995 khan men's doubles-ah ball girl a vuak per a, an disqualify. 

Argentine star David Nalbandian pawhin 2012 Queen's Club final-a Marin Cilic an inhmachhawn ṭumin line judge ṭhutna bula advertising hoarding a pet a, judge ngalah fuh telin an disqualify. Nalbandian hian set khatna 7-6 in a la tawh a, set hnihnaah 3-3 ni mah se ngaihdam a ni chuang lo.

Hremna tawktu Tim Henman chuan, "Official a tum lo, amaherawhchu a thil tih hremna chu a tuar tur a ni. Tuna thil thlen hma hian a lungawi loin advertising hoarding a vuak per tawh a, a lungawi lo," tiin Novak Djokovic a chhan lo.

Tennis inelnaah disqualify hi a vawi khat thlenna a ni lo a, chutihrualin tun ṭuma thil thleng erawh US Open-a champion tura rinkai lawrlak Djokovic laka thleng a nih avangin sawi zui a hlawh hle.

Seeded pangana Alexander Zverev chuan, "Line judge ber kher a fuh kha a vanduai a ni. Inch khat lek pawhin ball kalna kha danglam se thutlukna an thlak thei hial ang. Sawi belh tur vak pawh ka hre lo, mak ka ti," tiin a elpui hremna chu pawi a tih thu a sawi.

Djokovic-a coach hlui Boris Becker chuan, "Tihsual a nei a, tennis player tana hremna na ber a tuar a ni thei e. Amaherawhchu mihring siam ṭhat nan khaw dur hi  a ngaih chang a awm," tiin a thawhchhuah leh ngei a rinthu a sawi.