Italian club ngamtu Liverpool an kal zel

Premier League hmahruaitu Liverpool-in Champions League lamah pawh an season hman ṭhat an chhawm nung zel - Nilaini zan khan Champions League inkhelah Bologna chu 2-0 in an hneh a, tun season-a UCL match hnih an khelhah vawi hnih an chakna a ni.

Reds tan Alexis Mac Allister chuan goal hmahruai a khung a, a khungtu dang maw? A ngai bawk, Mohamed Salah a ni e - Anfield-ah Reds an chak a, hetihrual hian Italian club-in Liverpool an rum ṭhaih ve fo avangin nuam sa erawhin an chak lo.

Liverpool-in match ruk khelh tur an la neihah team lian tia chhal theih, hmachhawn tur an la neih chu Bayer Leverkusen leh Real Madrid an ni a, Arne Slot-a naute hian round of 16 chu harsatna nei loin an lut mai tura ngaih a ni.

A goal hma

Anfield-ah Liverpool-in goal khung turin hun an mamawh rei lo. Minute 11-na lekah Mac Allister chuan Salah-a cross duhthusam chu hnai set sawt aṭangin goal-ah a chantir a, Bologna tlarhnung tan tih theih a awm lo.

Mahse, a vawi khat nana Champions League khel Bologna an zuai duh bik lo a, Anfield-ah Reds ṭantute thin phu an tirang fo - Dan Ndoye chuan post a pet per a, Alisson chuan Kacper Urbanski-a chance neih chu ṭha zetin a dansak bawk.

Goal dang lut loin chawlhlawk hman a ni a, Liverpool tan a awlsam chuang lo. Bologna hian chance an insiam zui a, Alisson bawk chu chhandamtu a ni a, Riccardo Orsolini-a chance neih chu ṭha zetin a dang a, Urbanski chuan uiawm takin a hlah bawk - Reds an vannei.

A tawpah Salah

Mahse, Liverpool-in Bologna neih loh an nei a, a hming chu Mohamed Salah a ni - Dominik Szoboszlai-a ball pek chu Egyptian forward hian a insiamrem hnuah, goal chung kil sirah mawi zetin a thlawh lut a, chak tur a chiang zui.

Salah-a'n Champions League-a a goal 49-na a khung a, tun season-ah Liverpool tan inelna hrang hrangah match kua khelin goal ruk a khung leh der tawh a, assist vawi nga a nei bawk.

Kum 32 mi Salah hian Liverpool tan Champions League season khatah goal li aia tlem a khung ngai lo a, 2017-18 season kha season khata a khung hnem ber niin, goal 10 a khung - tun season-ah ama record hi khum a tum ang.

Chak phu Liverpool

Salah-a'n Liverpool goal hnihna a khung hian minute 75 a nih tawh avangin Bologna tan beisei a bo tawh, tiin a sawi theih. Liverpool an chak a, an match hmasa pahnihah Italian club ve ve an hneh - Bologna hma hian AC Milan chu San Siro-ah 3-1 in an lo hneh tawh bawk.

Liverpool tan ṭum dang ang thoin Ryan Gravenberch a khel ṭha a, AC Milan laka man of the match hian Darwin Nunez leh Luis Diaz tan ball ṭha zet pe mah se, goal-ah an chantir thei lo ve ve.

Uruguayan striker Nunez-a vanneih zan a ni lo - a goal khung offside vangin pawm a ni lo a, Slot-a hnuaia beisei anga la inlan tam lo striker hian tun season-ah goal khat chiah a la khung. Bologna lamah Thijs Dallinga-a goal khung chu offside vang thoin pawm a ni lo bawk.

Klopp thlaktu Slot

Liverpool-in tun season-ah match kua khelin, match riatah hnehna an chang a, Jurgen Klopp thlaktu Slot hi Reds manager zinga a match hmasa pakuaa heti zat chak thei hmasa ber a ni. Mahse, Dutch coach hian hei aia sang zawk a suangtuah thu a sawi.

Slot chuan, "Engtia rei nge he hmunah hian ka awm dawn ka hre lo a, mahse, ka chhuah hnua 'a match hmasa pakuaah vawi riat a chak asin' an tih lek nih ka duh lo - hei aia ropui zawk hi ka duh. A ṭha famkim nih chu engtiklai mahin a theih loh a, mahse, kan tum zel a ngai a ni," a ti.

Kum kua dawn Anfield-a hun a hman chhungin Jurgen Klopp khan Champions League nomawi vawi khat a chawi a, vawi hnih final-ah tlawm zawk niin, quarterfinal-ah vawi hnih an tawp a, Europa League final a hruai thleng bawk - Slot tan sulhnu chhunzawm hautak a ni dawn.