Sinner hnehin Alcaraz a champion

Carlos Alcaraz chuan mipa tennis world number 1 Jannik Sinner hnehin China Open nomawi a chawi - Spanish star hian tun season kal laiah ATP Tour title pali a la tawh a, tennis a khelh hun chhungin title 16 a la tling ta chiah bawk.

Nilaini tlai khan Diamond Court-ah final khelh niin, tunlai player ṭha pahnih te an inkhel tawk hle - inkhel inhnehtawk takah kum 21 mi Alcaraz hian 6-7 (6-8), 6-4, 7-6 (7-3) in hnehna a chang, set khatna hloh mah se huaisen takin a tho chhuak.

Alcaraz chuan, "Jannik khan khawvela a ṭha bik a nihna chu a takin a lantir leh ta, a khelh dan kha a level a sangin hmachhawn pawh a harsa takzet a ni. Set khatna la tur khan remchang ṭha lutuk ka nei a, chu pawh min rawn pawtthla leh hial.

"Player ṭha tak ka hneh thei kha ka lawm, ka khingpui khan eng ang pawhin ball rawn vua se la ka lo hmachhawn thei zel, chu chu ka lawmna lai tak pawh a ni, hun harsa laia insiamrem theih hi a hlu.

"Set khatna kan khelh zawh chiah kha chuan thi leh thau pawlha ka khelh a ngai tih ka hre tawh mai a, hnehna ka chan theih nan khan ka theihtawp tak meuh meuh ka chhuah a ni," tiin a sawi.

US Open-ah khan second round lekah Alcaraz hi a chak lo, a hnu lamah erawh ropui takin a tho chhuak mek. China Open nomawi a chawi hma hian laver Cup-ah Team Europe chu a hlawhtlinpui bawk, a zawnin match kua a chak tling tawh.

Set hnuhnung ber an khelh laiin Sinner chu a che fuh hmasa zawk niin, 3-0 ngawtin hma a hruai fal hman - amah service hum chho zel ni se la chuan champion turin a dinhmun pawh a ṭha hman hle, mahse a tawpah Alcaraz zawk a dingchang.

Alcaraz chuan, "Final bik chauh kha a ni lo a, kar tluan maiin ka khel ṭha em em a ni. Ka khelh fuh bakah ka vannei tel bawk, match danga ka tihsual leh point ka hlohna ṭhin angah khan ka hmu leh hlauh ṭhin," tiin a sawi.

Tennis season a zo dawn hnai a, tunlai hian Asia khawmualpuiah inelna an nei mek. A thiam zual pariat inelna ATP Finals an la hmabak a, tun ṭuma final kheltu Alcaraz leh Sinner te hi inlan turin an tling tawh a ni. Turin, Italy-ah an la intawng leh thei dawn a ni.