Benfica-in Atletico an sawp!

Nilaini zan Champions League meuh chu thilmak thlen zana puan tlak a ni - Benfica khelmualah dawl zawrin Atletico Madrid an zawr a, Portuguese club hian Spanish club ṭha hi 4-0 ngawtin an lo sawp.

Lisbon khawpuia inkhelah Benfica tan Kerem Akturkoglu chuan minute 13-naah goal hmahruai a khung a, goal dang lut loin chawlhlawk hman zui a ni. Atletico boss Diego Simeone-a'n si phurh an sut theih beiseiin minute 46-naah substitution pathum ngawt a siam.

Antoine Griezmann la chhuakin, Alexander Sørloth a luhtir a, captain Koke aiah Conor Gallagher lutin, Rodrigo de Paul aiah Javi Serrano a lut bawk. Mahse, Argentine coach-in thutlukna a siam sual tih a lang zui.

Minute li hnu lawkah English midfielder Gallagher a chesual a, penalty area-ah Vangelis Pavlidis lakah a foul - referee-in hmu lawk lo mah se, Video Assistant Referee (VAR) rawn a nih hnuah penalty a chawi.

Real Madrid forward hlui Angel Di Maria a lo pen chhuak a, Spanish football-a a hmelma hlui Atletico hi Portugal lama a inkhelh hnuah pawh a vel nawn - an goal hnihna a khung a, 2-0 a ni.

Atletico-in an goal hnihna an chhuah a, an tho leh tawh lo - Gallagher bawk a chesual nawn a, Alexander Bah a ven hneh loh avangin Bah hian Benfica goal thumna a khung.

Madrid khaw club an chesual zui. Reinildo Mandava chuan ṭul loah penalty a chawi a, Orkun Kokcu chuan goal-ah a chantir - hun tawp thlengin goal dang a lut tawh lo a, khualmualah Atletico an mualpho.

Pathianni zan khan Madrid derby khelh a ni a, inkhel boruak sang an khelh zawh hnu lawkah Madrid khaw club pahnihten Champions League an khel zui a, an chak lo ve ve. Mahse, Simeone chuan an chak loh hi chhuanlamah a hmang duh lo.

Argentine coach chuan, "Kan khel chhia a, chu chu kan pawm a ngai. Kan ti ṭha tawk lo a, substitution ka siamin ṭum dang angin min kai harh lo a, kan khel chhe takzet - keini aiin Benfica an ṭha zawk a, chu chu kan pawm a ngai a ni," a ti a, an chak loh a pawm.

Benfica laka goal li chhuah hi Atletico tan mualphona a ni a, an match hmasa zawkah 2-1 a RB Leipzig an lo hneh tawh avang erawh chuan beiseina chuaina tur a ni lo. Spanish club-in an la hmachhawn leh tur zingah Paris Saint-Germain leh Bayer Leverkusen an tel tih erawh theihnghilh loh a ṭha.

Wolverhampton Wanderers boss hlui Bruno Lage enkawl Benfica erawh an thaw huai ang. Atletico hma hian Red Star Belgrade chu khualmualah 2-1 in an lo hneh tawh bawk a, match hnih aṭangin point ruk an nei - hmabakah Bayern Munich, Barcelona leh Juventus an la awm thung!