Villa Park-ah Villans tan zan duhawm bik

Aston Villa ṭantuten Champions League inkhel en man san an sawisel a, mah se Villa Park-a German club lian Bayern Munich an hneh hnuah erawh European football-a inelna sang ber en man hla zia an hria ang. A chhan chu, Unai Emery hote hian October 2, Nilaini zan khan Bavarians 1-0 in an hneh a, goal awmchhun hi substitute Jhon Duran a khung ni.

Vincent Kompany-a'n thutlukna danglam tak siamin Jamal Musiala chu bench-ah a dah a, a hmunruak hi Michael Olise tan a zau mah mah. Bavarians goal bawh a na tawk lo a, Harry Kane-a'n a chance ṭha neih hmasak goal-a a khung loh theih loh bakah a offside hrim hrim bawk.

Villa-in Pau Torres hmangin minute 22-naah an khung a, Villa Park-ah thawm ṭha hman mah se VAR inrawlh hnuah offside vangin pawm a ni lo. Minute 79-naah erawh Villa goal khung pawm a ni tawh a, Torres-a ball pek luh chu Duran-a'n goal-ah petin goalline aṭanga rawn chhuak thui Manuel Neuer a pet khum mawi hle.

English club an ṭang tluan a, 1982 European Cup final ang thoin Villa-in Bayern 1-0 in an hneh a, an club history-a hun chhinchhiahtlak a ni ang. Unai Emery hote hian October 6, Pathianni zanah Manchester United an mikhual lehnghal dawn a, German club laka an result hian inrintawkna nasa tak a pe ang.