Barcelona keeper thar Szczesny

Hmanni lawk khan football khelh chakna leh phurna ka nei tawh lo, chhungkua ka ngaihtuah a ngai tiin Wojciech Szczesny chuan inkhelh a chawlhsan a, thla tam pawh a liam hmain Barcelona goalkeeper a ni leh ta der mai.

Kum 34 mi Szczesny hian August thla khan football a chawlhsan thu a puang, a club khelh mekna Juventus tan contract la nei mah se inremsiam tawnna in an ti tawp - sum tama hmun pan tur anga sawi thawm awm mah se chhungkua a hun hman a tum thu a sawi thung.

September thla a lo ni a, vanduai thlak tak maiin Barcelona leh Villarreal te inkhelh ṭumin goalkeeper Marc-Andre ter Stegen a inhliam a, Germany international hi tun season chhung a inkhel thei dawn tawh lo tih a chiang zui nghal.

La Liga dan leh hraiah chuan, player inhliam thla li aia rei chawl tur an awm chuan, club nei lo player lakluh an duh a nih chuan an la thei a ni, hemi dan hmang hian Ter Stegen thlak nan Szczesny hi an la.

Szczesny hian tun hmain Arsenal, AS Roma leh Juventus tan a khel tawh a, inelna sang leh boruak lianah tawnhriat a nei ṭha tawh hle. Tunah chuan La Liga hmahruaitu tan si ban a nghak dawn a ni a, a tum loh lamah chona danglam a hmachhawn dawn tihna a ni.