Lille khelmualah Real Madrid an tlawm!

Champion lai Real Madrid chu Champions League-ah an tlawm a, an ngam loh chu Lille an ni - i chhiar dik e, Carlo Ancelotti enkawl Real an tlawm a, French club Lille lakah a ni an chak loh; 1-0 in.

Lille tan Jonathan David chuan inkhela goal awmchhun hi penalty aṭangin a khung a, European champion-in a chhanletna tur an neih loh avangin inelna hrang hranga match 36 hnuah a vawi khat nan an tlawm.

Carlo Ancelotti hnuaia Real tlawm hnuhnung ber hi January 18 daih tawh kha a ni a, Atletico Madrid lakah a ni. Rin loh takin Lille khelmualah an tlawm ve leh ta a, Spanish champion tan zan duhawma chhiar tlak a ni mawlh lo.

Chak phu Lille

French club langsar pawh ni lo Lille lakah Real an tlawm a, "Lille-in chak an phu" tih chu tam tak tan a awihawm lo mai thei - inkhel en tan erawh thudik a ni a, Lille khelmualah Spanish champion-in point hlawhchhuah an phu lo.

Lille hian first half hun pek belhah penalty aṭangin inkhela goal awmchhun hi an khung. A tirah referee-in penalty pe lo mah se, video assistant referee rawn a nih hnuah referee-in penalty spot a kawk.

French midfielder Eduardo Camavinga chuan Edon Zhegrova freekick chu a kutin a lo dang a, referee-in penalty pekna turah a ngai - Jonathan David chuan harsatna awm loin goal-ah a chantir a, Canada striker hian tun season inelna hrang hranga match 12 a khelh aṭanga goal riat a khungna chiah a ni.

Real an nguai

Lille hian tun season Champions League-a an match hmasa zawkah Sporting Lisbon chu 2-0 in an ngam lo a, an tiahpui club laka an result thlirin beisei a sang lo. Mahse, football-ah eng pawh a thleng thei tih chu a takin min temtir a, champion lai an hneh tlat.

Jonathan David vanneih zan ni se, goal tam zawk khung thei a ni a, mahse, French football-a striker 'hot' ber pawl hian penalty piah lama a chance neih duhawm vawi hnih chu uiawm takin a chhawr thei lo - keeper Andriy Lunin a che ṭha tlat.

Real hian hliam vangin an keeeper chhuanvawr Thibaut Courtois an chhawr thei lo a, tun season-a a vawi khat inlannaah Lunin che chhe lo mah se, a team erawh a chakpui zo lo.

A thlawn mai maw

Real tan kum 18 leh ni 73 mi ni chungin Endrick chuan inkhel bul a ṭan a, Real tana Champions League-a inkhel bul ṭan thei naupang ber record a siam. Mahse, Brazilian forward a reh a, Jude Bellingham a ngawichawi viau bawk.

Malpui hliam vanga an match hnuhnung ber pawh a khelh loh hnuah, Kylian Mbappe chu bench aṭanga luhtir a ni a, French striker luh hnuah Real inkhel nung sawt mah se, Lille lam an ṭang ve tlat a, goal a hlawh chhuak bik lo.

Real tan Antonio Rudiger-a ball tauh luh ngei tura lang chu goal line aṭanga clear a ni a, Arda Guler lahin uiawm takin chance a hlah bawk. An match hmasa bera VfB Stuttgart hnehtu Real an tlawm a, an hmabakah Borussia Dortmund, Inter Milan, AC Milan leh Liverpool an la awm avangin kawng a awlsam dawn lo tih a chiang.

Insiamṭhat ngai Real

Real-in Pathianni zana an inkhelh hnuah, Nilaini zanah match an nei lehnghal a, an chak zo lo - Real boss Carlo Ancelotti erawhin hei hi chhuanlamah a hmang duh lo a, an inzir tur thu a sawi.

Italian coach chuan, "Hmasawna insiamṭha turin engkim kan nei a, a rang thei ang berin kan insiamṭha ang. Pathianni zan leh Nilaini zana inkhelh hi chu kan nei fo a, zanin chu kan tiṭha lo deuh a ni mai. Hmasawn kan mamawh, chu chu a ni mai," a ti!

Ancelotti chuan Lille fak zuiin, "Lille khelh dan kha mak ka ti hran lo. An khel ṭha a, an phur a, keini aiin kil tinah an khel ṭha zawk. Kan match sawiseltute sawiselna a dik a, kan pawm ngam a ṭul. Kan theihna sang ber kan lantir lo a, hei hi kan tan darthlalang ni rawh se," a ti a, chhuanlam a zawng lo.