Mumbai-ah goal a lut lo

Ningani zan Indian Super League inkhelah Mumbai City chuan Bengaluru FC an mikhual a, goal a lut lo - team pahnih hi 0-0 in an ṭin. Bengaluru-in tun season-ah tlawm an nei lo tluang zel a, Mumbai an la chak miah lo thung!

Bengaluru hian match li aṭangin point 10 an nei ta a, Lallianzuala Chhangte captain-na hnuaia khel Mumbai hian match thum aṭangin point hnih chiah an nei thung. ISL champion lai hian an nomawi humhim an duh a nih chuan an insiamrem vat a ṭul ang.

Nilaini zan inkhelah hian ṭum dang ang thoin captain Lianzuala chuan inkhel bul a ṭan a, defender Hmingthanmawia Ralte (Valpuia) chuan bul a ṭan bawk - player pahnihin an khel chhe lo.

Bengaluru lamah Lalremtluanga Fanai pawh bench aṭangin a lut ve leh a, Mizo midfielder hi a kum a la nau deuh avangin bul la ṭan chiah lo mah se, tun season ISL match li an khelh tawhah chuan Bangalore club tan a la inlan vek!