I League 3 champion nih tum Chanmari FC

Eng level pawh ni se, India rama champion nih chu thil harsa a ni - he thil harsa tithei dinhmunah hian Mizo club Chanmari FC an ding mek a, Pathianni tlai dar 3:00 hian I League 3 final-ah Diamond Harbour FC nen an intawng dawn.

I League 3 hi India rama club football inelna fourth division a ni a, India rama state tin champion emaw state aiawh club-te inelna a ni - sawi nep theih a ni lo. Chanmari FC-in Mizoram aiawhin inelna an hmachhawn a, final hial an khel dawn ta.

MPL club hi league match tawp ber an khelh hmain nakkuma khelh tur I League 2 aṭangin an inpettling tawh a, inelna hi knockout anga kalpui ni lo mah se, I League 3 champion an awm theih nan final khelh a ni dawn.

Final round-a group pahniha hmahruaitu ve ve chu final-a inhmachhawn tur hian tih an ni a, group A hmahruaitu Diamond Harbour leh Chanmari an inhmachhawn dawn ta - Indian football YouTube channel-ah live-a en theih a ni ang.

Chanmari zinkawng

Lalsangzuala Hmar enkawl Chanmariin I League 3 an ngam hle - RG Stadium, Mualpuiah group stage match thlengin, match li an khelhah an chak vek a, final round an lut chiang hle.

Mizo club hian 'Mahni muala khel alawm an nih' tia sawiselna awm thei chu Kolkata khawpuiah an thai reh zui a, final round match li an khelhah an chak vek - goal 10 an khung a, an lamah goal khat chiah a lut!

Group Stage-ah khan CFC hian goal 12 khungin an lamah goal hnih a lut a, inelna pumpuiah goal 22 khung tawhin, goal thum chiah an la chhuah tihna a ni. Tlarhmain an hna an tlin tluk zetin tlarhnung pawh an ṭha.

Chanmari chiah hi I League 3-a tlawm la nei lo awmchhun an ni a, Diamond Harbour hi an hneh leh a nih chuan Indian fourth division inelnaa season tluana tlawm nei lo awmchhun an ni dawn - Mizo club hian record hi an siam thei a nih ngat chuan khum leh a har tawh ang.

Engtinnge CFC?

Chanmari goalkeeper Zothanmawia'n hliam tenau a nei a, Kolkata club a hmachhawn theih dawn leh dawn loh a la chiang lo. Mizo keeper tawnhriat nei ṭha hi a inlan thei lo a nih chuan, a aia si ban nghak turin Simon Lalṭhazuala Hmar a awm.

Bengaluru midfielder hlui Malsawmzuala hi defensive midfield-ah a rintlakzia kan hmu nawn fo a, Chaltlang tlangval hian Indian football-a top division khel tur pawhin theihna a la nei - Lalrokima sawi hmaih a thiang lo a, India Under-17 international hlui hi Chanmari chet ṭhat nana player thawhhlawk a ni.

NorthEast United striker hlui Lalkhawpuimawia'n a tih tur a hlen ṭha ṭhin a, SAT laka bench-a dah striker hi Diamond lakah chuan bul ṭan tura beisei a ni. Goal ruk khung tawh Vincent Lalduhawma a inhliam a, Kolkata club a hmachhawn theih dawn leh dawn loh a la chiang lo.

Tlarhnungah captain Lalrinchhana Tochhawng a la rintlak reng a, tawnhriat nei ṭha Lalhmangaihsanga Ralte pawh ISL thlenga hun tam lo hmang tawh a nihna a hriat - Chanmariin national champion ni chunga lo haw an tum dawn.

Diamond chu

Kolkata club Diamond Harbour an chhe bik lo - an coach Kibu Vicuna hi Mohun Bagan, Kerala Blasters leh Mohammedan SC pawh lo enkawl tawh, La Liga club Osasuna-a assistant coach hlui a ni a, club budget a sang thawkhat ang tih a chiang.

Tlarhmaah East Bengal, ATK, Mohun Bagan leh Chennaiyin striker hlui Jobby Justin an nei a, a dinpui, Mohun Bagan striker hlui Naro Hari Shrestha hian tun inelnaah goal riat khung tawhin top scorer a ni mek.

Midfielder Pintu Mahata pawh East Bengal leh Bagan tana lo khel tawh a ni a, season hmasa khan I League-ah Rajasthan United tan a khel. Diamond Harbour player tam zawk hi I League lo khel tawh an ni a, Mizo club tan a awlsam lo ang.

Hriat tel tur chu final-a chak zawk hian hmingṭhatna piah lamah cheng nuai li an hlawh tel dawn a, Chanmari FC tan match khat lek chak zawh loh vanga heti zat hlawhchhuah zawh loh hi a uiawm dawn.