Player 10-a khel Man United tan Harry Maguire; Ten Hag-a hote hmabak Bayern hnehtu Aston Villa

Manchester United-in Nilaini zan khan Estadio do Dragao-ah mualneitu FC Porto chu 3-3 in an chelh. Erik Ten Hag-a hoten match li chhung chak hmel an hmu tawh lo a, chutihrualin chak lo zawn thei dinhmuna an din hnuah Harry Maguire-a'n a chhan chhuak.

October 6, Pathianni zan dar 6:30 hian Man United-in Aston Villa an tlawh dawn a, Unai Emery hote hi an muala Bayern Munich hneh thei an nih avangin Ten Hag-a hote tan hmabak a harsa khawp ang.

Goal ruk a lut

Tottenham laka mualpho Man United-in bul an ṭan ṭha a, minute sarihna lekah Marcus Rashford-a'n mual vei lam aṭanga la lutin goal-ah a pet a, Portugal no. 1 Diogo Costa-a'n a dang thei lo.

Mikhual team an phur zel a, Christian Eriksen leh Rashford te thawhrah sengin Rasmus Hojlund-a'n minute 20-naah a khung. Danish striker Hojlund hian tun season-a bul a ṭan hmasak berah goal a khung nghal.

Mahse, United tlarhnung a phui lo. Dinglam aṭanga Joao Mario cross chu Noussair Mazraoui-a'n an lamah tauhin goalkeeper Andre Onana-a'n dang mah se a per chu Brazil winger Pepe-a'n chiang zetin minute 27-naah a pet lut.

Minute 34-naah Porto-in siphurh an sut zo der a, Joao Mario cross chu Samu Omorodion-a'n a tauh goal. Second half-ah pawh Porto bawkin bul an ṭan ṭha a, Pepe-a'n thui tak a khalh luh hnuah a cross ball chu Omorodion-a'n chiang zetin minute 50-naah a khung.

Man United-in siphurh sut tumin theihtawp chhah a, captain Bruno Fernandes-a'n box chhungah a ke a khai san avangin yellow card vawi hnihna a hmu a, minute 81-naah hnawhchhuah a ni. Portuguese midfielder hi Spurs an hneh loh ṭum pawhin hnawhchhuah a ni tawh bawk.

Ten Hag-a'n goal mamawh laiin defender pahnih Matthijs de Ligt leh Lisandro Martinez te la chhuakin defender pahnih Maguire leh Jonny Evans te a luhtir a, mak a tih hlawh hle. Hemi hnu hian Fernandes-a hnawhchhuah a ni zui a, Dutch manager tan a thutlukna hi mualpho pui theih a ni.

Mahse, injury time-ah Eriksen-a corner kick pet chu Maguire-a'n a tauh lut a, Ten Hag-a substitution a fuh. Man United hian Porto lakah point khat chauh hlawh chhuak mah se player 10 a an khelh hnua an thawhchhuah avangin an result-ah an lawm ang.

Villla Park-ah mualphona?

Man United-in Erik Ten Hag-a awm ṭantirhah season ṭha tak hmang nghal mah se season liam ta aṭang khan Premier League-ah an chetsual an ngah a, tun season-ah pawh a la danglam chuang lo. Liverpool laka an mualpho hnuah Ten Hag-a hote hi Spurs lakah an mualpho leh tawh a, an khingpui tur Villa hian season bul an ṭan ṭhat avangin Man United tan a harsa dawn.

Ten Hag-a hoten tlarhnung thuam ṭhat duhin tun season-ah De Ligt bakah Manuel Ugarte an lalut a, Premier League match ruk aṭangin goal riat an chhuah tawh a, an goal difference pawh -3 a ni. Dutch manager-in Villa lakah tlarhnung rem phui a tum dawn a, a hnampui De Ligt a awltir a rinawm.

De Ligt hian Porto forward tharum ngah Omorodion a ngam lo a, Villa lamin Ollie Watkins leh Jhon Duran te an neih avangin Dutch defender tan hian hna a awlsam dawn chuang lo. Hei vang hian Porto laka goal pawimawh khungtu Maguire chu Lisandro Martinez dinpui tur a ni thei ang.

Mahse, Porto lakah hian Martinez leh Casemiro te pawh an che ṭha chuang lo a, United buaina hi awlsam taka chinfel theih a ni dawn lo. Tlarhma lamah Hojlund-a'n goal a khung tawh a, Rashford a chet ṭhat chhunzawm theih bawk chuan Villa laka chakpui tham a ni dawn.

Villa hian UCL-a Bayern an hneh hma hian Young Boys 3-0 in an sawp tawh a, Premier League-ah Ipswich lakah point khat chauh hlawh chhuak mah se tun season match ruk aṭanngin vawi li an chak a, Arsenal chauh an hneh lo.

Villa hian Amadou Onana an lalut a, Belgian midfielder hi a hnampui Youri Tielemans nen inkawpin team thahrui an ni a; tlarhma lamah Jhon Durán leh Ollie Watkins te an hriam bawk. Unai Emery hote hian season liam taa ṭum hnih ngawt an hneh loh Man United hneh let an châk dawn a, Ten Hag tan erawh a hna chelh chhunzawm duh chuan tlawm a thiang lo ang.