Champion beiseitu Saka

Arsenal forward Bukayo Saka chuan tun season chu an tan Premier League nomawi chawi theihna hun ṭha a nih ngei a beisei a, an hun a thleng ve tawh dawn niin a sawi.

Mikel Arteta enkawl Gunners hi tun hnai season hnih chhung chu Manchester City elpui ber an ni a, mahse hun pawimawh laia chetsual leh zauh an chin avangin Pep Guardiola naute an tluk thei lo.

Tun season league match vawi ruk an khelh tawhah Man City leh Arsenal te point hmuh a inzat mek, hmahruaitu Liverpool an phak lohna chu point khat a ni mek - nomawi inchuh boruak a sang chho dawn viau.

England international Saka chuan, "Thil sawi lawk leh mahni min vaw let thei tur lo sawi chiam hi ka duh lem lo. Chutihrualin, tun season chu Arsenal tan EPL nomawi chawi kum a nih ngei ka beisei.

"Nomawi kan chawi theuh thei em em mai a, tun hnai season hnih chhung ngat phei chu kan champion lohna kha tlemte chauh a ni, ka beisei leh hmuh dan chuan kuminah hian kan hnaih zual," a ti a, beisei a nei sang hle.

Kum 23 mi Saka hi a vanduai zingah a tel thei hle - Arsenal tan season hnih chhung pahnihna an nih tawh bak a, an ram Three Lions chu Euro final vawi hnih luhpui tawh mah se, champion lo zawkah an ṭang ve ve a ni.

Saka chuan, "Tun hnaiah pahnihna ka ni thei hle. Chuvangin, kan thlenn chin aṭanga hmasawn hretin, hlawhtlinna changtu zawk nih ka chak takzet a ni. Team ṭha kan ni a, kan inringtawk bawk - chuvangin kan ti thei ang," a ti.

Saka awmna Arsenal hian Champions League lamah Paris Saint Germain an hneh zo chiah a, zanin dar 7:30 hian Premier League khel turin Emirates Stadium-ah Southampton an mikhual zui leh nghal ang.