Chelsea tan buaina tur a awm lo!
Enzo Maresca-a'n a player ṭha ṭhenkhat phei chu a ziak duh rih lo hial a, ziah luh zinga ṭhenkhat chu hahchawlhna hun a pe cheu bawk - hetiang chung hian Chelsea tan UEFA Conference League chu buaina tur a awm chuang lo.
Ningani zan Stamford Bridge-a inkhelah Blues hian an mikhual Gent chu 4-2 in an hneh a, nuamsa takin anmahni mualah hnehna an chang - Pathianni zan dar 6:30-ah Notthingham Forest nen Premier League an khelh tur an ngaihtuah leh thei tawh ang.
Goal lut tam
Defender Renato Veiga chuan minute 12-na lekah Mykhailo Mudryk siamsak a khung ṭan a, chawlhlawk hma hma chiahin winger Pedro chuan an goal hnihna a khung - goal luh dawna Axel Disasi hnathawh hmuh hmaih theih a ni lo.
Second half-ah Gent an phur thar ve deuh, defender Tsuyoshi Watanabe-a khung chu video assistant referee vanga endik a nih hnuah an pawm a, minute 50-naah goal an neih avangin beiseina an nei thar.
Mahse, inkhel thununtu Chelsea bawkin goal hnih dangin an chhanglet - forward Christopher Nkunku leh midfielder Kiernan Dewsbury-Hall ten goal an khung avangin, hun tawp dawna Omri Gandelman-a khungin awmzia a nei phak lo.
Blues indah ṭha
Conference League kheltu squad hi kum tharah ziah danglam theih a ni dawn, hei vang hian inelna tir lam hmachhawn tur zingah Cole Palmer, Romeo Lavia leh Wesley Fofana te chu telh an ni lo - Ben Chilwell erawh chhawr duh lo vang a ni thung.
Squad-a awm zingah pawh coach Maresca chuan Nicolas Jackson leh Jadon Sancho te chu hahchawlhna hun a pe a, midfielder Enzo Fernandez leh Moni Madueke te chu bench lamah dah an ni bawk.
Blues player zinga a langsar lo deuh ho, tun ṭuma an chhawrte man zat hi pound maktaduai 400 a tling tho a, an khingpui Gent player man tam ber chu Momodou Sonko niin, pound maktaduai ruk man chauh a ni thung.
Maresca a lungawi
Bazar hun an hman danah Chelsea fiamtu an tam a, an khelh danah erawh fiam mai mai chi an ni lo. Coach Enzo Maresca chuan khelmual chhunga lut apiangin ṭha taka an khel thei chu a lawm thu a sawi.
Italian manager Maresca chuan, "Match tin atan hian inbuatsaihna hran a ngai ṭhin, a chhan chu kan khingpuite an danglam ve zel vang a ni, tun ṭumah pawh khan kan duh ang takin kan khel thei, chu chu a lawmawm.
"Ka naute zinga ṭhenkhat kha chuan bul an ṭan ve chauh a ni a, chutiang chunga puitling taka an khel thei khan min ti lawm," a ti. Kar tawpa Premier League an khelh turah pawh result ṭha neih chhunzawm ngei an tum ang.