Salah hma hun a chiang thei lo

Liverpool-in result duhawm neih chhunzawm mah se fan-te thla a muang thei lo - an player pawimawh captain Virgil van Dijk, Trent Alexander-Arnold leh Mohamed Salah ten season tawp rualin contract an hmang zo dawn a, player pathum hian tun thlengin contract thar an la ziak lo.

Salah hian ualau takin Anfield-ah contract thar zawrh a nih loh thu hi a lo sawi tawh a, tun season-ah pawh Reds tan player langsar bera la chhal ngam ni mah se, a hlawh tam piah lamah kum 32 mi a nih tawh avangin Liverpool hi an inngaihtuah deuh niin a lang.

Hetiang boruak karah hian Paris Saint-Germain chuan Salah hi Paris khawpui lama seng luh an duh nia sawi a ni a, French club hian free transfer-a an lakluh theih dawn avangin Egyptian forward hlawh sang tak pawh pek an inhuam khawp ang.

Khawthlang media ṭhenkhat chuan, Luis Enrique enkawl team hian kum thum atan contract an zawrh dawn niin an tarlang hial a, Egyptian forward tan pawh hnial a harsa dawn. Salah hi Saudi Pro League lam pawhin an ngaihven reng a, mahse, amah hian European football chhuahsan lam hi a la awn rih lo niin an sawi.

Hetiang boruak karah hian German chanchinbu lar Bild chuan Reds hian Borussia Dortmund forward Karim Adeyemi chu Salah thlakna turin an thlithlai niin an sawi a, kum 22 mi forward tan hian Reds hian pound maktaduai 41 sen an inhuam tih thlengin an tarlang.

Jurgen Klopp-a hnuaia Liverpool an indinthar leh theih nana player pawimawh ber ang hiala chhal ngam Salah hian tun season-ah pawh a thiam a la theihnghilh lo. Reds tan inelna hrang hrangah match kua khelin goal ruk a khung leh der tawh a, assist vawi nga a nei bawk.

Amah thlak nan Liverpool-in an duh nia sawi Adeyemi hian match riatah goal nga a khung tawh a, assist vawi nga a nei bawk - Salah hmun ruak meuh hnawhkhah erawh thil awlsam a ni lo ang tih a chiang.

Premier League hmahruaitu Liverpool hi vawiin tlai dar 5:00-ah league match khel turin an inlan dawn a, khualmualah Crystal Palace an lenchilh ang.