Europa League-ah Spurs chak

Premier League lama beisei phak lo, harh tharna chang ṭan Tottenham Hotspur-in Europa League lamah pawh an theihna an pholan chhunzawm a, player naupang ruala khel chungin Ferencvaros chu 2-1 in an hneh.

Spurs tan Pape Sarr leh Brennan Johnson ten goa khat ve ve an khung a, mualneitu Hungarian club tan Barnabas Varga chuan goal khat khung ve mah se minute 90-na a ni tawh a, a team beng harh turin hun a tam tawk tawh lo.

Tottenham-in Europa League match hnih an khelh aṭangin point ruk an nei ta a, coach Ange Postecoglou lawmna tizualtu tur chu player naupang rual a chhawr chunga heti zata an chak thei hi a ni - Manchester United laka 3-0 a an chak ṭum aṭangin player pasarih ngawt a thlak danglam.

London club tana bul ṭan zingah player pali - winger Mikey Moore (kum 17), midfielder Lucas Bergvall (18), defender Archie Gray (18) leh striker Will Lankshear (19) te chu kum 20 la tling lo ṭhah an ni a, goal khungtu Sarr (22) leh Johnson (23) pawh an kum a la tam lo hle.

Postecoglou chuan tun season-a match li khel tawh Mikey fakin, "Kum 17 miin, minute 90 chuang, European football-a khualmuala a khel chu ropui tak a ni. Tlin takin a hna a thawk a, hei hi ka beisei dan sa pawh a ni - footballer ṭha ni tura a zinkawngah hei hian nasa takin a pui ang," a ti.

Spurs boss chuan player naupang dang fakin, "Player naupang ka duh hrim hrim vanga kan squad-a tel an ni lo a, he team tana khelh phak hi an hlawhchhuah liau liau a ni," a ti a, a chhuang hle.

Tottenham hian tun season-a an league match hmasa paliah vawi khat chiah chak an nei a, mahse, an match hnuhnung pahnihah chakin an insiamṭha a, Europa League-ah player naupang zawk nen an chak leh tak avangin inrintawkna an nei sang sawt ang - Pathianni zan dar 9:00-ah league match khel turin Brighton & Hove Albion an lenchilh zui ang.