Vawiinah Papuia pual inkhel

Mizoram footballer hranghluiten vawiin hian RG Stadium-ah F. Lalchhandama (Papuia) Memorial Football Tournament an buatsaih dawn. Hranghlui player-te chu zone liah (team pali) ṭhenin an inkhel ang a, Papuia lo khelh tawhna ṭhin PWD FC leh Rest XI (kum 55 chunglam) te an inkhel bawk ang.

Papuia hi Aizawl XI, PWD Sporting Club leh Mizoram aiawhin vawi tam tak a lo khel tawh ṭhin a; a hun laia inelna ngaihhlut Subroto Cup, Santosh Trophy, Bordoloi, CMs Gold Cup, Ambassador For Sports (Russia) nen te a lo khel tawh bawk.

Santosh Trophy-a Mizoram champion puitu coach H. Vanlalthlanga chuan, "Papuia hian technique leh skills a nei ṭha a, a ball pass hi a ṭha em em a, a ri thlup mai a ni. Kum 1987 khan SYS-in Regional Training Centre, Republic Vengah thla thum chhung awh Summer Coaching Camp kan buatsaih a, Papuia hi Maneiha, Khuala, Vantea te nen an tel a, an inkhel kha a hmuhnawm thei hle," tiin Vanglaini a hrilh.

Thlanga chuan sawi chhunzawmin, "Papuia hi ke vei lama pet a nihna hi a danglamna a ni a, a shooting pawh a ṭha hle. Tun hma player-te khan theihna sang tak an nei a, mah se tunlai player-te angin khelhna chhuahna tur ṭha an nei ve lo a, an vanduai takzet a ni," tiin a sawi. Papuia hi Mizo chhulchhuak midfielder-ah chuan a ṭha ber zinga mi a ni a, a pual hian hranghlui player-te RG Stadium-ah an pungkhawm ang.