Jerry-a mawi zanah Odisha chak zo lo

Indian Super League inkhel hmuhnawm bikah Ningani zan khan Odisha chuan Kerala Blasters an mikhual a, goal li luhna inkhelah team pahnih hi 2-2 in an inhnehtawk.

Odisha khelmualah Blasters an tlangnel a, 2-0 in hma an hruai hman. South Indian club tan hian Noah Sadaoui leh Jesus Jimenez te chuan minute 21 chhungin goal an khung ve ve a, 2-0 a ni.

Mahse, Odisha-in mahni muala tlawm an duh lo a, an 'comeback' - chakna goal an khung theih loh avangin an 'comeback' erawh a famkim thei ta lo a, an ui vawng vawng ang.

Odisha tan hian Kerala Blasters player Alexandre Coeff chuan si phurh sut ṭhensakin, an lamah a tilut a, Diego Mauricio chuan chawlhlawk hmain si phurh a sut zo - Brazilian forward goal khung hi Jerry Mawihmingthanga siamsak a ni.

Chanmari tlangval Jerry Mawia hian ISL-ah assist 21 a nei ta a, ISL chanchina assist ngah panganaah a invawrh chho - Indian player-ah chuan Mumbai City tana khel mek Brandon Fernandes chu a tluk loh awmchhun a ni.

Odisha hian first half-ah si phurh sut zo mah se, goal dang an khung tawh lo a, Isak Vanlalruatfela'n goal khungna remchang a neih a chhawr thei lo - Odisha hian tun season ISL-ah match li khelin vawi khat chiah an la chak a, point li an nei mek.

Ningani zan inkhelah Jerry Mawia leh Isaka bakah defender Jerry Lalrinzuala leh midfielder K. Lalṭhathanga te chuan inkhel bul an ṭan a, Blasters lamah Mizo inlan an awm lo.