La Liga: Zaninah siamṭhat ngai Real - Pathianni zanah Barca

European top flight league zinga ngaihven hlawh pawl La Liga pawh khelh a ni ve leh ta a, nizan khan Leganes leh Valencia intawngin result kan hre hman lo.

Zanin dar 12:30-ah champion lai Real Madrid an inlan dawn a, tun hnaia che ṭha tak Villarreal an mikhual dawn avangin inkhel hmuhnawm a beisei ngam ang.

An league match hnuhnung bera rin loh taka tlawm Barcelona chu Pathianni zan dar 7:45-ah an inlan dawn chauh a, khualmualah Alaves an lenchilh ang - match hnuhnung bera Osasuna hneh lotu hi inchhuang thei an awm lo.

Pathianni zan dar 12:30-ah Atletico Madrid an inlan dawn bawk a, Diego Simeone naute hian Real Sociedad chu khualmualah an lenchilh dawn a ni.

Siamṭhat ngai Real

Tun season-a league match riat an khelhah Real la tlawm lo mah se, vawi thum draw an nei a, hmahruaitu Barcelona chu point thumin an phak lo mek - an match hnuhnung berah Madrid derby khelin Atletico Madrid chu 1-1 in an inhnehtawkpui.

Champions League lamah an chesual zui a, season hmasaa La Liga leh Champions League nomawi chawitu hian French club vantlang Lille chu khualmualah 1-0 in an hneh lo a, an mualpho.

Inkhelh zawhah coach Carlo Ancelotti-a'n chhuanlam zawng thei an nih loh thu a sawi a, Lille ṭhat zawk thu a sawi. Zaninah Italian coach-in a thusawi ngai sawi nawn a duh lo ang tih a chiang a, Villarreal lakah chak ngei a duh dawn.

Mahse, a awlsam dawn lo - Villarreal hian league match riatah vawi khat chiah tlawm an la nei a, pahnihna Real an phak lohna hi point khat chauh a ni. Santiago Bernabeu-ah Real khum tumin an khel ang.

Barca hi

Hansi Flick-a hnuaiah Barca an hmuhnawm a, goal khung an ṭhulh lo a ni ber. Mahse, an league match hnuhnung berah Catalan club hi an chesual ve thei tih hrilhriatin an awm a, khualmualah Osasuna chu 4-2 in an ngam lo.

German coach Flick-a'n a ngaihtuahna a seng nasa hret niin a lang a, match an neih tam ngaihtuah chunga a player siksawi nasa lutuk chu an tuar. Inkhelh zawhah pawh Flick hian a mawhphurhna a nih thu a sawi.

Mahse, Champions League lamah Catalan club hi insiamṭha zuiin, Swiss Super League club Young Boys chu 5-0 ngawtin an sawp a, Pathiani zanah pawh Alaves hneh an inbeisei ang - Alaves hi an muala match hnih an khelh tawhah an la tlawm lo tih erawh hriat a ṭha.

Barca tan tun season-a goal sarih khung tawh Robert Lewandowski chu tlarhmaah innghahna a ni leh ang a, goal nga khung tawh Raphinha leh goal li khungtu Lamine Yamal te an awm bawk avangin hmachhawn châkawm an ni lo.

Atletico beiseina

Nipui transfer-ah beiseina sang tak nen sum tam tak an seng a, mahse, Atletico Madrid-in an beisei ang result erawh an nei rih lo - goal khung turin Julian Alvarez chu pound maktaduai 80 chuangin la lut mah se, Manchester City striker hlui hian goal hnih chiah a la khung!

Tun season-a Atletico tana khung hnem ber Antoine Griezmann pawhin goal thum chiah a la khung a, tlarhmain harhtharna chan an mamawhzia hei hian a pholang. Hmahruaitu Barcelona-in goal 25 ngawt an khung tawh laiin, Atletico hian goal 12 chauh an la khung.

Madrid khaw club hi table-ah palina an ni mek a, point nga ngawtin Barca hi an phak lo tawh - match riat an khelhah la tlawm lo mah se match liah an khingpui an inhnehtawkpui a, an sum hman nena ngaihtuahin uanpui chi a ni lo.

Atletico hian Madrid derby-a Real nen an in draw hnuin, Champions League-ah team tenau zawka ngaih Benfica chu 4-0 ngawtin an ngam lo a, an mualpho - Pathianni zanah 'team thar' Atletico hmuh fan-ten an beisei ang.