Japan hi hriatthiam a harsa - Martin

MotoGP rider championship hmahruaitu Jorge Martin chuan Japanese Grand Prix chu hriatthiam a harsa tih thu a sawi - Pathianni chawhma dar 10:30 hian Twin Ring Motegi-ah intlansiak an nei ang.

Spanish rider Martin chuan, "Season hmasa kha chuan ka tlan ṭhain ka vannei hle a, kumin erawh a danglam dawn hle. Ka hmuh lawk dan chuan a hnung lam deuh aṭangin chak tuma ka beih a ngai dawn niin la hria," a ti.

Season hmasa Japanese GP kha ruah sur nasa vangin an ti tawi deuh a, intlansiak ngaihven hlawh takah Martin hi a chak ber, kuminah pawh hmahruaitu a nih bakah sulhnu a neih ṭhat avangin en bik a hlawh ang.

Martin chuan sawi zawmin, "Khawchin awm dan tur kan enlawk a, inrin thiam a harsa dawn khawp mai. Intlansiak kan neih hnuhnung zawk te nen pawh a boruak a inang deuh mai thei, kan fimkhur a ngai dawn," a ti.

MotoGP an tlan hnuhnung ber Indonesia MotoGP-ah khan Martin hi a chak - Sprint Race lamah chesual mah se, intlansiak takah hnehna a chang, amah hnaih bertu Francesco Bagnaia aiin point 21-in hma a hruai fal theih phah.

Champion tur hian Martin leh Bagnaia chauh an inel lo, a nihna takah chuan intlansiak hmabak an la neih neih nual avangin Enea Bastianini leh Marc Marquez te hi sawi bo theih an ni lo ang.