Premier League champion tur Liverpool-in Man United football zirtir
Liverpool-in Pathianni zan khan Anfield-ah inkhel thunun chungin Manchester United 2-0 in an hneh. English club zingah Jurgen Klopp-a hote elpha an awm loh avangin Reds-in a vawi khat nan Premier League an champion la tih theih lohna chu hun leh chhiarkawp dan chauh a tih theih tawh!
Liverpool hi an hnuai chiaha awm Manchester City aia match khata khel tlem chungin point 16 in an sang fal tawh a, Old Trafford-ah United nen an inhnehtawk tih loh chu an la chak vek.
Puitling leh naupang
Old Trafford-ah Man United an vanduai a, team ṭha zawk Liverpool-in point khat an phu tawk tih hre mah se an hmelma kulhpui an luhchhuah theih loh avangin an lungawi thei lo. Jurgen Klopp-a hoten Anfield-a Man United mikhual hun an nghakhlel a, an nghah chhuah meuh chuan an inpeihzia a lang.
Minute 14-na lekah Trent Alexander-Arnold corner pet chu Virgil van Dijk-a'n a tauh lut a, Anfield thawm a ṭha nghal hle. Reds-in Roberton Firmino hmangin goal hnihna an khung zuiah an ngai a, amaherawhchu VAR hmanga enlet a nih hnuah Van Dijk chu United keeper David de Gea lakah a foul avangin pawm a ni lo. Sadio Mane-a'n United tlarhnung a paltlang hnuah ṭum danga a thun ṭhinna angah a khung lo a, second half ṭantirhah ngat phei chuan Liverpool player-te'n chance an inhlah siak. Salah-a'n yard ruk lek aṭangin a pet goal lo a, Jordan Henderson-a ball pet kawh ṭha zet De Gea-a'n a khawih fuh hman avangin goal ban a per a, United an him hram hram.
Liverpool-in goal an khung theih loh vangin vanduai thei dinhmunah an ding. First half-ah Andreas Pereira-a'n hnai tak aṭangin a tlawh goal lo a, Anthony Martial-a'n pet tura rem taka a insiam hnuah a pet over luah. Juan Mata luh hnuah United inkhel a nung hret a, Klopp-a hoten pawng paw nawr bansanin goal venhim an tum ta thung.
Injury time-ah United-in corner an hmu a, goal beiseiin an chhuak huk. Liverpool keeper Alisson-a'n remchang lain ball a man rualin Salah tan ṭha zetin a pet chhuak a, Welsh winger Daniel James-a tihbuai karah Egyptian forward hian 'cool' takin David de Gea kap karah a khung. United lamah a goal vawi khat khungna lawm nan Salah hian a kawr a phelh a, ball petu Alisson chu lawmpui tura rawn thleng hmasa ber a ni. Liverpool leh Manchester United inhalzia hre pha chin chauhin Anfield boruak nawm dan tur an hrethiam pha ang.
Klopp a lawm
Liverpool manager Jurgen Klopp chuan, "Ka thawveng huai a, kan khelh dan 85-90% khan minti lawm. Inkhel kan thunun a, khatianga ṭhaa khel tura kan tha thawh kha a awihawm loh hial zawk," tiin an khelh danah a lawm thu a sawi.
Klopp chuan sawi chhunzawmin, "Ṭum dang ang chu ni se, first half aṭanga second half minute 65 thleng khan goal thum tal chu khung tur kan ni a, hahdam taka a tawp khar thei tur kan ni. Goal khat bak kan khung miau loh avangin United an rawn insiam rem a, goal venhim a ṭul phah. Tihsual neuh neuh kan nei chho a, mahse a tawpah goal mawi danglam tak kan khung a, a nuam veng veng," tiin inkhel an thunun thu a sawi.
Manchester United manager Ole Gunnar Solskjaer chuan, "Second half ṭantirhah talbuai deuh mah ila hun tawp lam minute 25-30 chhung kha chu kan khel ṭha hle. Kan nauten an theihna zawng zawng an chhuah a, chutihrualin corner leh inkhela ball pet tawpna bera goal an khung kha pawi ka ti," tiin an khelh danah lawmna tur a awm thu a sawi.
Liverpool 'The Invincibles'
Liverpool-in nikum January 3-a Manchester City an hneh loh hnuah Premier League-ah match 39 chhung hneh loh an tawng tawh lo a, May 7, 2003 - October 16, 2004-a Arsenal record ropui zet vawi 49 tlawm loa an kaltluang record pawh a him ta lo.
Liverpool hian Arsenal record nih rual turin Wolves, West Ham, Southampton, Norwich, West Ham, Watford, Bournemouth, Everton, Crystal Palace leh Manchester City te an la hmachhawn dawn. Tun dinhmuna an khelh dan thlir chuan Jurgen Klopp-a hote dal thei tur nia lang chu Manchester City chauh an awm tiin a sawi theih a, chutihrualin football-ah chuan thilmak a thleng ve ṭhin bawk. Arsenal erawhin an record duhawm tak hneh loh nei loa champion an humhim duh a nih chuan an kutah a awm, Gunners hian May 2 khian Emirates Stadium-ah Liverpool hi an mikhual dawn.
Jurgen Klopp-a hote hian champion chiang turin match 10 dang chak an la mamawh. Fixtures an thlak danglam lo a nih phei chuan April 4-a Etihad Stadium an tlawh hunah Manchester City nen an inhnehtawk pawhin an tum ram an thleng thei ang.
Match 39 chu...
2018-19 Season
1 Brighton & Hove Albion 0–1 Liverpool
2 Liverpool 4–3 Crystal Palace
3 Liverpool 1–1 Leicester City
4 West Ham United 1–1 Liverpool
5 Liverpool 3–0 Bournemouth
6 Manchester United 0–0 Liverpool
7 Liverpool 5–0 Watford
8 Everton 0–0 Liverpool
9 Liverpool 4–2 Burnley
10 Fulham 1–2 Liverpool
11 Liverpool 2–1 Tottenham Hotspur
12 Southampton 1–3 Liverpool
13 Liverpool 2–0 Chelsea
14 Cardiff City 0–2 Liverpool
15 Liverpool 5–0 Huddersfield Town
16 Newcastle United 2–3 Liverpool
17 Liverpool 2–0 Wolves
2019-20 Season
18 Liverpool 4–1 Norwich City
19 Southampton 1–2 Liverpool
20 Liverpool 3–1 Arsenal
21 Burnley 0–3 Liverpool
22 Liverpool 3–1 Newcastle United
23 Chelsea 1–2 Liverpool
24 Sheffield United 0–1 Liverpool
25 Liverpool 2–1 Leicester City
26 Manchester United 1–1 Liverpool
27 Liverpool 2–1 Tottenham Hotspur
28 Aston Villa 1–2 Liverpool
29 Liverpool 3–1 Manchester City
30 Crystal Palace 1–2 Liverpool
31 Liverpool 2–1 Brighton & Hove Albion
32 Liverpool 5–2 Everton
33 Bournemouth 0–3 Liverpool
34 Liverpool 2–0 Watford
35 Leicester City 0–4 Liverpool
36 Liverpool 1–0 Wolves
37 Liverpool 2–0 Sheffield United
38 Tottenham Hotspur 0–1 Liverpool
39 Liverpool 2–0 Manchester United