Nations League-ah Germany an chak thei lo

Ram inelnaa football record nei ṭha ber zinga mi Germany-in UEFA Nations League-ah chak an la nei lo. Joachim Low hote hi kuminah chauh ni loin kum 2018-a inelna ṭan a nih aṭang khan chak an la nei lo hrim hrim.

Thawhṭanni zanah Germany hian St Jakob-Park-ah Switzerland an tlawh a, Ilkay Gundogan hmangin minute 14-naah hma hruai mah se mualneitu hian Silvan Widmer hmangin minute 57-naah an sut.

Germany coach Joachim Low-a'n Kevin Trapp leh Emre Can aiah Bernd Leno leh Matthias Ginter te a luhtir a, Arsenal keeper-in inhliam vanga hun rei tak a chawlh hnua a inlan thei hi London club tan chanchin lawmawm a n.

Switzerland-in Nations League hmasa berah semifinal an lut a, kuminah erawh Ukraine 1-2 a hneh loin bul an ṭan. Coach Vladimir Petkovic-a'n player pathum thlakin Widmer, Loris Benito leh Renato Steffen ten bul an ṭan.

Germany-in bul an ṭan ṭha, Leroy Sane leh Timo Werner te hmangin Switzerland tlarhnung an chhaih buai. Minute 14-naah Ginter-a'n box chhung aṭangin fing takin a pe let a, Gundogan-a'n box pawn chiah aṭangin goal kilah a pet lut.

Joachim Low hoten goal engzat nge an khung belh ang tih chu zawhna awm thei mah se an che ṭha zui lo. Granit Xhaka hoa khel Switzerland an hlauhawm zui bawk. 

Breel Embolo-a ball fing chu Steffen-a'n goal zawnah pet mah se keeper Leno-a'n a dansak. German club Borussia Monchengladbach tana khel Embolo a langsar.

Switzerland forward Haris Seferovic-a'n ball duhthusam chu a pet pial avangin Germany an him hlauh. Xhaka-a ball pet kawh tak chu Leno-a'n a dang a, Seferovic-a'n goal ban a pet per bawk. Germany pawhin chance an nei ve tho a, Julian Draxler-a'n keeper zawn chiaha a pet chu an chance ṭha zual a ni.

Joachim Low-a'n halftime-a a hun neih chu tlarhnung siam ṭhat nan a hmang thei lo. Minute 57-naah Embolo ball pass chu Widmer-a'n tiding khawtlai loin a hlap goal - keeper Leno tan tih theih a awm lo.

Germany-in tlarhnung siam ṭhat nan Niklas Sule aiah Jonathan Tah an luhtir a, amaherawhchu Low-a tana chanchin lawmawm zawk erawh hliam vangin minute 73-naah Breel Embolo tlak a ngai.

Switzerland-in goal dang an khung belh thei lo a, 1-1 in an inhnehtawk. Germany tan erawh inhnehtawk hi chak lo ang maia na ni mah se inkhelh dan aṭanga thlir chuan point hmu lo thei an ni.

Joachim Low-a'n 2014 FIFA World Cup-a Germany a champion pui hnuah kum 2017 khan Confederations Cup nomawi chawi mah se tlakhniam lam an pan zel tihin a sawi theih. 

World Cup hnuhnung berah group stage an paltlang lo a, insiamṭhat tumin Low-a'n Thomas Muller, Jerome Boateng leh Mats Hummels te a koh loh tur thu a sawi zui mah se rah ṭha a chhuak chuang lo. Die Mannschaft hian Nations League-ah hneh an la nei lo a, Low-a'n pressure a ngah phah sawt ang.

Joachim Low chuan, "2-0 nih theihna hun ṭha kan hlah a, Switzerland an insiamṭhat phah. Goal hmaah kan hriam tawk lo a, ṭum dang kan pha lo. October thlaah chuan tun aia ṭhain kan rawn let ang," tiin a sawi a, Ukraine leh Switzerland an hmachhawn hunah Bayern Munich player ṭha te an tel tawh ang.