Fati-a'n Spain record a siam

Spain-in Nations League-a an group hmahruaitu ni turin Ukraine 4-0 in an sawp. Captain Sergio Ramos-a'n goal hnih a khung a, rawlthar duhawm Ansu Fati-a'n ram tana bul a ṭan hmasak berah goal khungin Manchester City lak thar Ferran Torres-a'n a tawp a khar.

Barcelona rawlthar Ansu Fati hi kum 17 leh ni 311 mi a ni a, Spain tana goal khung naupang ber record kum 95 chhung ding tawh chu a khum. 

La Liga lamah Ansu Fati thiam zia hmuh a ni tawh a, Luis Enrique-a'n bul a ṭantir pawh hi a mak hran lo. Ṭan phat aṭangin Fati hi a nung nghal em em a, ball thiam vang liau liuain minute hnih lekah Sergey Krivtsov lakah penalty a hlawh - Ramos-a'n a khung.

Fati hian minute 32-naah box pawn aṭangin goal ban berin a hlai lut a, a kum anga en chi a ni lo - a thiam thlawt. Ukraine lakah hian goal attempt vawi ruk a nei a, goal zawnah vawi hnih a kal. An khingpui te box chhungah ball vawi 10 a khawih a, Fati hi a kum aṭanga thlir loh pawhin khelmualah a langsar hle. 

Spain manager Luis Enrique chuan, "Fati hi ka lawmpui hle. Kum 17 mi chauh a nih hma sawn zel turin dim a ngai. A kum angah hi chuan inngaihtlawmna leh thuhnuai rawlh taka an awm a ṭul a, Fati hi chuan a ti thei a ni," tiin a player hi a fak hle.

Kum 1925 khan Juan Errazquin-a'n Switzerland lamah kum 18 leh ni 344 mi niin goal a khung a, Fati hian a rawn khum chiah. La Liga leh Champions League-ah pawh goal khung thei naupang ber dinhmun a luah mek bawk. 

Kum 34 mi Ramos hi penalty pet thiam a nih avangin goal a khung tam a, chutihrualin ram tana goal 23 a nihna tak hi a ropuina chu a ni. Tun ṭuma Spain squad-a player dang zawng goal khung zat belhkhawm hi goal 27 a ni a, Ramos aiin goal li chauhin a tam.

Minute 74-naah Man City winger thar Ferran Torres-a bench aṭangin a lut a, minute 84-naah a pet goal nghal. Pep Guardiola tan Torres khelh dan a lungawi thlak ang. 

Spain-in keeper atan David de Gea an ring chhunzawm a, goal a chhuah lo. Manchester United-a a elpui tur Dean Henderson erawh England match hmasa berah a inlan lo.