I League 3: Chanmari an champion zo ta lo

'Shabash, Halleluiah...' tiin an hlapui nena Kolkata khawpuia zai châk viau mah se, Chanmari FC-in I League 3 final-ah hnehna an chang zo lo a, Kolkata club Diamond Harbour chu 1-0 in an hneh lo - Ragav Gupta chuan inkhela goal awmchhun a khung.

Chanmari FC-in Diamond Harbour an tawn hmain I League 3-ah match riat an khel a, an chak fai vek. Goal 22 ngawt an khung a, an lamah goal thum chiah a lut - match thumah bak goal an chhuah lo a, Mizo club sulhnu a ropui hle.

Mahse, Kalyani Stadium-ah mualneitu Diamond Harbour an tawn meuh chuan Chanmari an ṭha tawk lo a, India fourth division champion nih phu zawk chu Kolkata club an ni. Mizo club-in goal an khung lo a, khelmualah an ngam lo tel bawk.

Chanmari tan tournament duhawm tak erawh a ni tho. Mizo club hian final round-a an match hnuhnung ber khelh hma khan I League 2 an lo inpetkai tawh tho a, nomawi nen lo haw lo mah se, season tharah Indian football third division inelna an hmachhawn ang.

Thutlukna fuh lo

Coach Lalsangzuala Hmar a inringtawk a, mahse, final-ah rin loh takin tawnhriat nei ṭha Lalkhawpuimawia (Mapuia) chu bul ṭantu zingah a tel lo a, ISL-a NorthEast United tan pawha lo khel tawh Mapuia'n boruak sanga bul a ṭan lo hi a mak.

Chanmari player langsar zingah forward Joseph Lalvenhima pawh bench lamah awmin, tun inelnaa goal ruk khung tawh Vincent Lalduhawma chu hliam vangin a la inkhel thei lo bawk.

Hetihlai hian hliam tenau nei goalkeeper Zothanmawia erawh Mizo club tana si ban nghakin bul a ṭan thei a, defender tawnhriat nei ṭha Lalhmangaihsanga Ralte (Sena Ralte) chu hrem vangin a inlan thei lo.

Mizo club inrem dan thlirin, Kolkata club aiin an fimkhur zawk niin a lang a, Kolkata khawpuia mualneitu club hmachhawn an nih avangin Sanga leh a hote an fimkhur hi a awm lo hran lo.

A goal hma

Kerala Blasters coach hlui Kibu Vicuña enkawlna hnuaia khel Kolkata club an ṭha a, bul ṭantu zingah East Bengal striker hlui Jobby Justin, tun inelnaa goal riat khunga top scorer ni mek Naro Hari Shrestha te an awm a, a harsa dawn tih a chiang.

Kolkata club hian mahni mualah Mizo club an ngam a, inkhel ṭantir aṭangin an nawr nghal - minute 30-naah goal an khung a, Chanmari tlarhnung pherh vang a ni. Mizo club defender-ten an tih tur an ti tawk lo.

Diamond Harbour full back Sunil B-a'n duhthala ball tlanpuiin, Chanmari defender-ten an dang thei lo a, heta ṭanga ball kal hi midfielder Ragav Gupta chuan box pawn aṭangin goal-ah a chantir.

Gokulam Kerala keeper hlui T. Mawia'n a goal lai thlir mai loh chu tih theih a ni lo a, Mizo club tan a awlsam dawn lo tih a chiang nghal.

A har a ni

Chanmariin goal an chhuah hnuah pawh Diamond Harbour nawr an harsat a, goal an khung aṭanga minute ruk hnu lawka Kolkata club tana striker Naro Hari Shrestha-a'n T. Mawia chauh hmachhawn chunga a khung lohte chu uiawm tak a ni.

Mizo club-in awmze neiin Diamond Harbour an nawr thei lo a, first half tawp hma hretin Lalrokima'n box pawnah hun nei mah se a pet chhe hret - mualneitu club thin phu a tirang phak lo.

Chanmari FC-in first half chhungin si phurh an sut hman lo a, an dinhmun a chhe tawh tih loh rual a ni lo. Coach Sanga'n goal khung duhin Mapuia leh MS Dawngliana te a luhtir a, MPL club goal nawr a nat phah lo.

Diamond zawkin Mizo club an nawr chhunzawm a, Chanmariin tho leh tur hmel an pu lo - Ephraim Lalremtluanga'n mual sir aṭanga chance a nei tih loh chu Mizo club tan chance ṭha tia sawi tur a awm lo a, Aimar Adam vanneih zan ni se, Mizo club hi si tam zawk phur thei an ni.