Zanin dar 8:00-ah MPL11 semifinal: Aizawl FC Vs Sihphir Venghlun

LZ Juice MPL11 semifinal hmasa zawk chu zanin dar 8:00 hian Aizawl FC leh Sihphir Venghlun ten an khel dawn a, semifinal hi double leg-a khelh tur a ni. Inkhel en man hi Rs 50 a ni a, second leg hi tunkar tawpa khelh lehnghal tur a ni.

Aizawl FC hi MPL-a sulhnu nei ṭha ber an ni a, vawi li an champion tawh. Mahse, I League club hian Covid-19 hnuah MPL champion nomawi an la chawi leh lo a, Victor Lalbiakmawia hoin champion an tum ruh hle. Sihphir Venghlun tan erawh an thlen chin apiang hi thil thar a ni a, I League club hneh hi khawtlang anga hlawhtlinna a tih theih ang.

Sihphir Venghlun hian tun hnaiah hlawhtlinna an chang fo a, ADFA First Division-ah pawh 2022-23 season khan an champion. Football hmanga veng/khua inelna hnuhnung ber LPS Cup-ah an champion thei a, Mizoram pum huap Inter Village Futsal inelnaah an champion bawk.

Mahse, Mizorama football hmanga inelna sang ber champion erawh Sihphir Venghlun tan a harsa dawn. Hei bakah hian semifinal hi ṭum hnih khelh tur a ni a, minute 180 khelh tur a nih avangin vanneih a harsa dawn.

October 11, Zirtawpni hian second leg an khel leh ang a, match hnih chhunga chak zawk an awm lo a nih chuan extra time khel loin penalty shootout hmangin chak zawk an zawng ang.

LZ Juice MPL11 semifinal hmasa zawkah Aizawl FC leh Sihphir Venghlun te zanin dar 8:00 hian RG Stadium-ah an inkhel dawn. I League club hian league winner nomawi an chawi a, zanin semifinal inkhel turah pawh an buk a rit hle.

Aizawl FC hian semifinal thleng turin match 14 aṭangin goal 44 tehmeuh an khung a, goal 10 chauh an chhuah. Victor Lalbiakmawia hote hian tlarhnung khawng ṭha ber an nih bakah goal bawh na ber an ni bawk.

A thar hlak

MPL11-ah Aizawl FC hian Sihphir Venghlun hi ṭum hnih an hneh tawh a, an inhmachhawn hmasak ṭum phei chuan 6-1 ngawtin an sawp. Mahse, coach Victor-a chuan, "Kan inkhelh tawhna kha chu a zo tawh a, semifinal-ah a ṭangkai tawh lo. Rilruah kan dah thei tawh lo. Tunah a thar hlakin kan khel leh dawn a, inkhel pawh kan la thutak ang. Game hnih khel turin kan inbuatsaih a, first leg-a zawh fel vek kan tum lo," tiin Vanglaini a hrilh.

Aizawl FC hian tlarhma an nei ṭha a; Lalbiakdika, C. Lalhriatpuia, Laltlanzova, Augustine Lalrochana leh Lalrinzuala te khelh ṭhat ṭum a nih chuan, first leg-ah chak zawk tur chiang thei a ni. Mahse, coach Victor-a'n first leg-a mawl mang taka an nawr loh tur thu a sawi thung.

MPL11-ah semifinal khel tur a chiang har a, Aizawl FC tumpui tur pawh a hriat lawk lo. I League club hian round 14 hmain Mizoram Police, Sihphir Venghlun, Ramhlun Athletic, SYS FC leh Chawnpui FC te semifinal-ah an la hmachhawn thei vek. Hemi chungchang hi sawiin Victor chuan, "Duh thlang tur pawh ni ila, thlan tur pawh kan hre lo. Semifinal lut chin chu team ṭha an ni tih a chiang a, chak tur chuan anni aia kan thawhrim a ngai," tiin a sawi.

Aizawl FC hian tun season league winner nomawi chawi tawh mah se MPL11 champion nomawi chawi an duh dawn a, Sihphir Venghlun lakah sa huai an ser a nih pawhin a mak lo ang.

An fimkhur dawn

Sihphir Venghlun coach Robert Laldinthara chuan, "Kan inkhel tawhna aṭangin a chiang a, Aizawl FC nen kan inthlau hle. Kan khingpui turte theihna kan hria a, kan theihna kan hria a, chuvangin goal venhim tumin kan khel ang," tiin Vanglaini a hrilh a, ât huai an tum lo.

Round 13-ah khan Sihphir Venghlun hian Aizawl FC lakah goal venhim hna an thawk a, 2-0 chauhin an chak lo. AFC goal hmasa zawk hi goalkeeper tihsual a nih bakah goal hnuhnung hi referee tihsual nia a lan avangin Sihphir Venghlun hi an chet ṭhat phawt chuan I League club hi hneh thei a ni.

Sihphir Venghlun hian midfield-ah captain JH Lianzuala bakah Lalbiakzuala leh Rony C. Lalenkima te an nei a, tawnhriat nei ṭha tak vek an ni. Goal nawrna atana hman Lalthanpuia (goal 8) leh Malsawmtluanga Pautu (2) te goal khung zat belh khawm ringawt pawh goal 10 a tling a, Aizawl FC tlarhnung tibuai thei tur an ni.

Tlarhnungah Lalrindika leh Malsawmtluanga Hrahsel te an inkawp a, mual sirah Zohmingsanga leh Lalramhluaha te an awm. Aizawl FC an hmachhawn dawn miau avangin tlarhnung lam an rim dawn a, I League club laka hnehna an chan theih nan Sihphir Venghlunin veng mipui ṭawiawmna an mamawh ang.