Champion hlui Kerber a tla

US Open hmeichhe champion hlui Angelique Kerber chu last 16-ah vuak tlak a ni a, champion tura rinkai Naomi Osaka erawhin Anette Kontaveit hnehin quarterfinal a inhlangkai thung.

Nimin zing Flushing Meadows, New York-a inkhelah American nula Jennifer Brady chuan Kerber hi 6-1, 6-4 in a hneh. Grand Slam vawi thum champion tawh Kerber hian ball a vaw sual hnem a, a bik takin set hmasa zawkah a service a hloh nasa bawk.

Brady hian quarterfinal-ah chuan Yulia Putintseva a hmachhawn leh dawn, inkhel dangah Putintseva hian seeded pariatna leh chak tura rinkai ni zawk Petra Martic chu 6-3, 2-6, 6-4 in a lo barakhaih ve bawk a ni.

Seeded parukna Petra Kvitova pawhin match point vawi li ngawt a hmuh a chhawr ṭangkai theih loh a tuar. Wimbledon champion hlui hi tualchhung player Shelby Rogers lakah 7-6 (7-5), 3-6, 7-6 (8-6) in a chak lo.

Inkhel dangah world number 1 hlui Osaka a la che fuh zel thung. Japanese nula hian Anette Kontaveit chu 6-3, 6-4 a hnehin quarterfinal a lut. Seeded palina Osaka hian Kvitova hnehtu Shelby Rogers a hmachhawn leh ang.

Osaka leh Rogers te hi tun hmain vawi khat chauh an la intawng, an intawn hmasak hian Rogers a chak zawk. Osaka chuan, "Ka la hneh ve loh a nih avangin rinkai lo zawk ka ni mai thei, ka theihna zawng zawngin ka khel ang," a ti.