Vawiinah Mizoram inlan dawn

North East state-te inelna Dr T Ao Trophy-ah Mizoram chuan vawiin tlai dar 4:00 hian Meghalaya an hmachhawn dawn. Inelna hi Kohima, Nagaland-ah neih a ni a, Mizoram hi group B-ah Sikkim, Assam leh Meghalaya te nen an awm ho.

Mizoram coach  Lalrem-tluanga chuan, "Kan player hruaite an dam kim vek a, inelna neihna tur hmun Indira Gandhi Stadium-ah pawh training kan nei tawh. Artificial turf phah thar a ni a, RG Stadium nen a len zawng pawh a inan avangin khelh a nuam khawp ang," tiiin Vanglaini a hrilh.

Mizoram hi kum 2012 khan Sikkim-ah Dr T Ao Trophy-ah an champion a, kum 2014 khan Lammualah an champion leh bawk. An champion hnuhnun ber hian Mizoram hian semifinal-ah Meghalaya chu penalty shootout hmangin an hneh. Amaherawhchu nikum khan Lammuala Santosh Trophy qualifying round-ah Mizoram hian Meghalaya hi an hneh lo a, final round an khel theih loh phah a ni.