Man City, Arsenal leh Liverpool te an chak

Manchester City tan nomawi humhim a awlsam dawn lo - Liverpool chu Premier League hmahruaitu an ni chhunzawm a, champion tum Arsenal an chesual duh bik lo bawk - English club lian pathumte hian Inrinni zan khan an khingpui an hneh vek.

Arne Slot enkawl Liverpool chuan Diogo Jota-a goal khat hmangin Crystal Palace 1-0 in an hneh - Reds an chak tih hresa chunga inlan Gunners chuan Southamton 3-1 a hnehin, nomawi kawl mektu Man City pawhin an mikhual Fulham 3-1 in an hneh.

Arsenal tho chhuak

Mikel Arteta-a'n captain Martin Odegaard a la chhawr thei lo a, a naute a rem ṭhin dan a siksawi hret. Gabriel Jesus chu tlarhma laiah awmin, a hnungah Kai Havertz an awm thung - Ben White a la dam loh avangin a hnung sirah Thomas Partey dah a ni.

Gunners hian inkhel thunun mah se goal hmaah an vannei tawk lo - an goalkeeper hlui Aaron Ramsdale chuan Partey-a pet ṭha takin a dansak a, Jorginho chuan goal ban hrulah kawh zetin a pet chhuak bawk.

Raheem Sterling-a ball hloh vangin Southampton lamin an vaw let thut a, mual sir lama ball changtu Cameron Archer chuan a hlauhawm chinah la lutin goalkeeper David Raya dan phak lohin goal kilah a khung - mualneitu lam an hawihai.

Mahse, Gunners an ngui rei lo - Bukayo Saka chuan Saints lamin ball an tih per chu fing tak maiin Havertz tan a pe nghal. German forward hian amah vengtu paltlangin goal kilah kawh zetin a chhuih lut a, minute thum chhung bak si an phur lo.

English forward Saka bawk a hmuhnawm, a thiam dan tak maiin mual dinglam sir aṭangin a lehlama awm Gabriel Martinelli tan a vawrh lut a, ani hian inngaihtuah buai miah loin angle zim zet aṭangin an goal hnihna a khung.

Goal thumna luh dawnah Saka finzia kan hmu - Saints defender Yukinari Sugawara chuan box chungah ball a ti per palh a, ball per hi Saka chuan laklawh nei miah loin a pet lut nghal - Gunners tana a khelh pui ṭhin Ramsdale tan dan ngaihna a awm lo.

City tan Kovacic

Erling Haaland hi mihring ve tho a ni a, match tinah goal a khung reng thei bik lo - Manchester City striker chhuanvawr an danbeh zanah Mateo Kovacic a inlar thung a, goal hnih khungin champion lai hi point thum hlu tak a hlawh chhuahpui.

Etihad Stadium-ah Fulham an tlangnel, striker Raul Jimenez-a'n a ken per mawi tak mai chu Andreas Pereira chuan hnai tak aṭangin an lo tlawh lut a, goal hnihna khung theihna remchang a neih chhunzawm erawh goal zawnah a pet lo.

Chawlhlawk hma deuhin Kovacic chuan corner aṭanga ball kal an tauh chhuah fuh tawk lo chu a pet lut a, second half tirah Chelsea midfielder hlui hian Bernardo Silva-a ball pek chu an goal hnihna leh hmahruaina ni turin a khung leh bawk.

Mikhual Fulham lamin counter attack hmangin an vaw let, player tlan chak Adama Traore chuan mual sir aṭangin a khalh lut a, goalkeeper Ederson chauh a hmachhawn tawh a, si phurh a sut ngei dawn emaw tih laiin Brazil international hian a lo dansak.

Minute 82-naah Jeremy Doku-a'n goal a mawi a khung a, 3-1 a hma an hruai hnuaah pawh Man City nuam sain an awm thei lo. Fulham lamin minute 88-naah Rodrigo Muniz hmangin siphurh an sut ṭhen a, Pep Guardiola hote goal chhuah belh tawh lo mah se an tlarhnung erawh enfiah a ṭul ang.

Man City hian tun season EPL an match hmasa berah Chelsea chu 2-0 in an hneh, a hnu lamah erawh goal an chhuah zel - hnehna chang ṭhin mah se an tlarhnung a la phui tawk lo hle, nomawi hum tur chuan goal khung bakah a hnung lam rem phui a ngai.