A chung berah Reds

Jurgen Klopp a chhuak tawh si a, a hmun ruak luahtu Arne Slot kha engtiang taka rin tur nge tih chu Liverpool ṭantu tam zawk pawhin an hrethiam mai lo - tuna an thlen chinah erawh Kop ho an lungawi rih viau ang.

Champions League khel zo hlim an ni a, coach Slot-a hian Selhurst Park-ah season hmang ṭha tak Luis Diaz chu bench lamah a dah a, tlarhma laiah Diogo Jota a awm - Portugal international hian Cody Gakpo siamsak chu chakna goal atan a khung a ni.

Reds tan Ryan Gravenberch a hmunnawm lehpek hle a, Dutch midfielder hian mual laiah inkhel a thunun - Alexis MacAllister lak chhuah a ni a, bench aṭanga Dominik Szoboszlai a luh hnuah pawh an inkhel a nghet zui hle.

Point thum hmuin Premier League hmahruaitu an ni a, chanchin lawmawm an neih lai hian goalkeeper Alisson erawh hliam vangin hun eng emawti chhung a chawlh a ngai dawn - Palace lakah Alisson hi a malpui a hliam a, minute 79-naah thlak a ni.

Kum 32 mi Alisson hian thla hmasa khan malpui hliam vangin match hnih a khel thei lo tawh bawk a, tun kar tawpah international match a awm dawn avangin Reds tana match a khelh loh tur a tlem phah thei deuh dawn a ni.

Reds manager Slot-a chuan, "Alisson chu chawlh kar eng emaw ti chhung a chawlh a ngai dawn, a hun rei zawng erawh ka sawi lawk thei lo," a ti. Damlohna vangin Caoimhin Kelleher a chawl mek a, Alisson thlaktu Vitezslav Jaros chuan point thum an hmuh theih nan Eberechi Eze-a pet chu ṭha takin a lo dansak a ni.

Reds hian Nilaini zanah Champions League an khel a, Inrinni tlai lamah Premier League khelh leh nghal. Slot chuan, "Football Association lam hian an ngaihtuah nawn a ngai a ni, nasa takin ka player siksawi a ngai tih pawh an hrethiam ang," tiin a sawi.